TÜRKMENISTANYŇ WE EÝRANYŇ ARASYNDAKY HYZMATDAŞLYK
Türkmenistan bilen Eýran Yslam Respublikasynyň arasynda hoşniýetli goňşuçylyk, birek-birege hormat goýmak we özara ähmiýetli hyzmatdaşlyk ýörelgelerine esaslanýan dostlukly gatnaşyklar üstünlikli ösdürilýär. Iki ýurduň arasyndaky gatnaşyklary mundan beýläk-de ösdürmek maksady bilen, dürli derejedäki duşuşyklar, gepleşikler we resmi saparlar yzygiderli geçirilýär.
Syýasy-diplomatik gatnaşyklar bilen bir hatarda, söwda-ykdysady, ulag-kommunikasiýa, energetika, oba hojalygy, medeni-ynsanperwer ulgamlarynda hyzmatdaşlygyň giňeldilmegi boýunça degişli çäreler durmuşa geçirilýär. Sebitara hyzmatdaşlygyň ösdürilmegi, şeýle hem iki ýurduň arasyndaky serhetýaka gatnaşyklarynyň pugtalandyrylmagy aýratyn ähmiýetlidir.
2025-nji ýylyň 6-njy okýabrynda Eýran Yslam Respublikasynyň Demirgazyk Horasan welaýatynyň Bojnurd şäherinde maýa goýum mümkinçiliklerine bagyşlanan milli maslahat geçirildi. Bu maslahata Eýran Yslam Respublikasynyň wise-Prezidenti jenap Jafar Gaempanah, Demirgazyk Horasan welaýatynyň häkimi jenap Bahman Nuri, Türkmenistanyň Eýran Yslam Respublikasyndaky Adatdan daşary we Doly ygtyýarly Ilçisi, Eýran Mejlisiniň agzalary hem-de beýleki resmi wekiller gatnaşdylar.
Geçirilen maslahatyň çäklerinde Türkmenistanyň Adatdan daşary we Doly ygtyýarly ilçisi Ylýas Gaýypow bilen Demirgazyk Horasan welaýatynyň häkimi jenap Bahman Nuri duşuşdy. Duşuşykda taraplar sebitleýin hyzmatdaşlygy ösdürmegiň meselelerini ara alyp maslahatlaşdylar we Türkmenistanyň hem-de Eýranyň arasyndaky ýokary derejeli saparlaryň möhüm ähmiýetini nygtadylar.
Şeýle hem, ilçi öz çykyşynda şu ýylyň dekabr aýynda Aşgabat şäherinde Türkmenistanyň hemişelik Bitaraplygynyň 30 ýyllygyna we 2025-nji ýylyň — Halkara parahatçylyk we ynanyşmak ýylynyň şygaryna bagyşlanyp geçiriljek halkara forumyň mazmuny we ähmiýetini aýratyn belledi. Munuň bilen baglylykda, Türkmenistan bilen Eýran Yslam Respublikasynyň arasyndaky gatnaşyklaryň giň gerimli we strategik häsiýete eýe bolmagy, olaryň dost-doganlyk gatnaşyklarynyň berk binýadynyň bardygyny görkezýär.
Arslan SYÝAHATOW,
Tükmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 5-nji ýyl talyby.