Türkmenistanyň we Belarus Respublikasynyň arasyndaky oba hojalygyna we medeni-ynsanperwer gatnaşyklaryna bagyşlanan onlaýn okuw sapagy
2021-nji ýylyň 4-nji iýunynda Türkmenistanyň Daşary işler ministrliginiň Halkara gatnaşyklary institutynda “Türkmenistanyň we Belarus Respublikasynyň arasyndaky oba hojalygy we medeni-ynsanperwer gatnaşyklary” atly tema bagyşlanan onlaýn görnüşde okuw sapagy geçirildi. Türkmenistanyň daşary ýurtlardaky diplomatik wekilhanalarynyň ýolbaşçylarynyň geçirýän toplumlaýyn onlaýn sapaklarynyň çäginde guralan bu okuw sapagyna Türkmenistanyň Belarus Respublikasyndaky Adatdan daşary we Doly ygtyýarly ilçisi Nazarguly Şagulyýew we institutyň talyplary gatnaşdylar.
Bu okuw sapagy türkmen diplomatiýasynyň milli mekdebiniň talyplarynyň diplomatiýa bilen bagly bilim derejelerini has-da kämilleşdirmek maksady bilen geçirildi. Sapagyň dowamynda çykyş eden ilçi Türkmenistanyň we Belarus Respublikasynyň arasyndaky gatnaşyklaryň, oba hojalyk we medeni-ynsanperwer ulgamlarynda ikitaraplaýyn we köptaraplaýyn hyzmatdaşlygyň has-da ösýändigini we giňelýändigini belläp geçdi. Bilim, sport we syýahatçylyk hem-de oba hojalyk, dokma, ýeňil senagat ulgamlaryny goldamak boýunça amala aşyrylýan bilelikdäki taslamalaryň hem-de maksatnamalaryň işjeňleşýändigini nygtady.
Okuw sapagynyň ahyrynda talyplar hormatly ilçä Türkmenistan bilen Belarus Respublikasynyň arasyndaky dostlukly we özara bähbitli hyzmatdaşlygy has-da ösdürmäge gönükdirilen sowallary berdiler we bu ugurda özara pikir alyşdylar.
Aýmaral IŞANGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň III ýyl talyby.