«TÜRKMENISTANYŇ PREZIDENTI ARKADAGLY GAHRYMAN SERDARYMYZYŇ ÖSÜŞ MAKSATNAMALARYNY DURMUŞA GEÇIRMEKDE DÖWLETIŇ WE JEMGYÝETIŇ BILELIKDÄKI TAGALLALARYNYŇ ÄHMIÝETI» ATLY MASLAHAT GEÇIRILDI
2024-nji ýylyň 28-nji fewralynda Türkmenistanyň Daşary işler ministrliginiň Halkara gatnaşyklary institutynda 2024-nji ýylyň fewral aýynyň 22-ne Türkmenistanyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklygynda Maslahatlar merkezinde Türkmenistanyň Halk Maslahatynyň Prezidiumynyň mejlisinde öňde goýlan möhüm işleri durmuşa geçirmek maksady bilen, «Türkmenistanyň Prezidenti Arkadagly Gahryman Serdarymyzyň ösüş maksatnamalaryny durmuşa geçirmekde döwletiň we jemgyýetiň bilelikdäki tagallalarynyň ähmiýeti» atly maslahat geçirildi.
Bu maslahata Türkmenistanyň Ministrler Kabinetiniň Başlygynyň Orunbasary, Türkmenistanyň Daşary işler ministri Raşit Meredow, ÝUNESKO-nyň işleri barada Türkmenistanyň Milli toparynyň jogapkär sekretary Çynar Rustemowa, Türkmenistanyň Mejlisiniň Halkara we parlamentara aragatnaşyklar baradaky komitetiniň başlygy wezipesini ýerine ýetiriji Kerimguly Geldiýew, Türkmenistanyň Gyzyl Ýarymaý Milli jemgyýetiniň başlygy Maral Açilowa, Arkadag şäheriniň maliýe we ykdysadyýet müdirliginiň emläk gatnaşyklary, telekeçiligi goldamak we hususylaşdyrmak bölüminiň esasy hünärmeni Parahat Meretliýew we Döwlet, hukuk we demokratiýa institutynyň direktory Ýagmyr Nuryýew, Türkmenistanyň Daşary işler ministrliginiň işgärleri, institutymyzyň professor - mugallymlary we talyp ýaşlary gatnaşdylar.
Maslahatda Gahryman Arkadagymyzyň hem-de Arkadagly Gahryman Serdarymyzyň taýsyz tagallalary esasynda ýurdumyzy durmuş-ykdysady taýdan özgertmekde, halkymyzyň bagtyýar ýaşaýşyny üpjün etmekde durmuşa geçirilýän işler, ýurdumyzyň halkara derejesinde gazanýan üstünlikleri, şeýle hem mejlisiň gün tertibinde seredilen «Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasyny» üstünlikli durmuşa geçirmek boýunça gaýragoýulmasyz işler dogrusynda öňde durýan wezipeler babatda täsirli çykyşlar edildi.
Çykyşlarda bellenilişi ýaly, Türkmenistanyň Halk Maslahatynyň Prezidiumynyň mejlisinde Arkadagly Gahryman Serdarymyzyň şu ýyl ýerine ýetirilmeli belent maksatly işler boýunça öňde goýan wezipelerini durmuşa geçirmegiň anyk ugurlary kesgitlenildi.
Her bir işde nusgalyk halypamyz Gahryman Arkadagymyzyň beýik başlangyçlary, hormatly Prezidentimiziň taýsyz tagallalary esasynda halk bilen häkimiýetiň jebisligini üpjün etmek, ýurdumyzda hemmetaraplaýyn kämil jemgyýeti kemala getirmek boýunça giň gerimli işler alnyp barylýar.
Türkmenistanyň Halk Maslahatynyň Prezidiumynyň jemleri boýunça maslahatyň çäklerinde “Gender deňligi” we “Ýaşlar” boýunça bölümçelerde «tegelek stol» maslahatlary geçirildi.
Ýaşlar - jemgyýetiň işjeň bölegi. Watansöýüji, ýüregi joşgunly, zähmetsöýer ýaşlar Berkarar döwletiň täze eýýamynyň Galkynyşy döwründe dürli ugurlarda öz ukyp-başarnyklaryny görkezýärler. Ýurdumyzyň, halkymyzyň geljekki ykbalyna dahylly möhüm wezipeleri üstünlikli durmuşa geçirmäge işjeň gatnaşýarlar.
Milli Liderimiziň hem-de hormatly Prezidentimiziň beýik ynamyny ödäp, Watanymyzy durmuş-ykdysady, hukuk taýdan mundan beýläk-de okgunly ösdürmek ugrunda alnyp barylýan işlere işjeň gatnaşmak biz - bagtyýar türkmen ýaşlarynyň borjumyzdyr. Ýaşlaryň hak howandarlary Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak, il-ýurt bähbitli işleriniň hemişe rowaç bolmagyny arzuw edýäris.
Altyn BABYŞOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.