30/11/-0001
694
TÜRKMENISTANYŇ MEJLISINIŇ DEPUTATLYGYNA DALAŞGÄR HÖDÜRLENDI
2023-nji ýylyň 16-njy fewralynda Türkmenistanyň Daşary işler ministrliginiň Halkara gatnaşyklary institutynda 2023-nji ýylyň 26-njy martynda geçiriljek Türkmenistanyň Mejlisiniň deputatlarynyň, welaýat, etrap we şäher halk maslahatlarynyň we Geňeşleriň agzalarynyň saýlawlary boýunça Türkmenistanyň Mejlisiniň deputatlygyna Aşgabat şäheriniň Berkararlyk etrabynyň 1-nji “Garaşsyzlyk” saýlaw okrugy boýunça dalaşgäri hödürlemek bilen bagly maslahat geçirildi. Maslahata Türkmenistanyň Halk Maslahatynyň iş dolandyryjysy Kasymguly Gulmyradowiç Babaýew, Türkmenistanyň Demokratik partiýasynyň, Aşgabat şäheriniň Berkararlyk etrap häkimliginiň jogapkär wekilleri, Magtymguly adyndaky Türkmen döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň professor-mugallymlary, Aşgabat şäheriniň Berkararlyk etrabynyň 1-nji “Garaşsyzlyk” okrug saýlaw toparynyň we onuň düzümine girýän uçastok saýlaw toparlarynyň agzalary gatnaşdylar.
Maslahatda Türkmenistanyň Mejlisiniň deputatlygyna Türkmenistanyň Demokratik partiýasy tarapyndan Türkmenistanyň Halk Maslahatynyň iş dolandyryjysy Kasymguly Gulmyradowiç Babaýew dalaşgär hökmünde hödürlenildi. Şeýle-de Türkmenistanyň Mejlisiniň deputatlygyna dalaşgär baradaky maglumatlar bilen tanyşdyryldy.
Maslahatyň dowamynda çykyş edenler türkmen jemgyýetiniň jebisligini açyp görkezýän saýlaw möwsüminiň barşynda Gahryman Arkadagymyzyň: “Häzirki zaman türkmen jemgyýetiniň durmuşynyň demokratik esaslaryny kemala getirmek, iş ýüzünde ynsanperwerlik taglymlary hem-de milli maksatnamalaryň düzgünlerini berjaý etmek, raýatlaryň hukuklarynyň we azatlyklarynyň üpjün edilmegi biziň geçirýän syýasatymyzyň ileri tutulýan ugrudyr” diýen sözlerini şygar edinmelidir diýip bellediler.
Maslahatyň ahyrynda oňa gatnaşyjylar 2023-nji ýylyň 26-njy martynda geçiriljek Türkmenistanyň Mejlisiniň deputatlarynyň, welaýat, etrap we şäher halk maslahatlarynyň we Geňeşleriň agzalarynyň saýlawlary açyklyk we aýanlyk, bäsdeşlik, hakyky demokratik ýagdaýda, guramaçylykly geçirmäge ähli mümkinçilikleri döredip berýän türkmen halkynyň Milli Lideri, Gahryman Arkadygymyza, hormatly Prezidentimize köp sagbolsun aýtdylar.
Jemile PÜRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň mugallymy.