TÜRKMENISTANYŇ KONSTITUSIÝASYNYŇ WE TÜRKMENISTANYŇ DÖWLET BAÝDAGYNYŇ GÜNÜNE BAGYŞLANAN DUŞUŞYK
2025-nji ýylyň 17-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli Halkara hukugy we deňeşdirme hukuk öwreniş kafedrasynyň “Ýaş hukukçylar” ylmy gurnagynyň guramagynda ýurdumyzyň belli halypa hukukçysy, Türkmenistanyň Kärdeşler arkalaşyklarynyň Milli merkeziniň bölüm müdiri, halypa mugallym, alym, hukuk ylymlarynyň doktory, professor, Türkmenistanyň at gazanan ýuristi, Hormatly il ýaşulusy Myrat Öwezgeldiýewiç Haitowyň gatnaşmagynda duşuşyk geçirildi. Duşuşyga institutyň talyplary we magistrleri gatnaşdylar.
Öz hünäriniň eýesi bolan halypa hukukçy talyp ýaşlara Esasy Kanunymyzyň kabul edilenine 33 ýyl bolmagynyň döwletimiziň ösmeginde möhüm ähmiýete eýedigi hem-de Türkmenistanyň Döwlet baýdagy milletimiziň agzybirliginiň, döwletimiziň Garaşsyzlygyny we hemişelik Bitaraplygynyň nyşanydygy barada belläp geçdi.
Berkarar döwletiň täze eýýamynyň Galkynyşy döwründe asuda asmanymyzda pasyrdaýan baýdagymyz halkymyzyň asyrlardan bäri döwletlilik barada edip gelen arzuwynyň hasyl bolmagydyr. Ýurdumyzyň Garaşsyzlygynyň hem-de özbaşdaklygynyň esaslarynyň mizemezdiginiň, halkymyzyň parahatçylyk, döredijilik, ynsanperwerlik we hoşniýetlilik maksatlaryna hemişe ygrarlydygynyň alamatydyr.
Aknabat DURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 2-nji ýyl talyby.