Türkmenistanyň hukuk goraýjy edaralarynyň işgärleriniň gatnaşmagynda wagyz-nesihat duşuşygy geçirildi
2023-nji ýylyň 15-nji sentýabrynda Türkmenistanyň Daşary işler ministrliginiň Halkara gatnaşyklary institutynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Arkadag şäheriniň Ruhyýet köşgünde Bilimler we talyp ýaşlar güni hem-de täze okuw ýylynyň başlanmagy mynasybetli geçiren umumy okuw sapagynyň ähmiýeti hakynda, şonuň ýaly-da Türkmenistanyň Garaşsyzlygynyň 32 ýyllyk baýramy mynasybetli wagyz-nesihat duşuşygy geçirildi.
Türkmenistanyň Adalat ministrliginiň, Türkmenistanyň Içeri işler ministrliginiň, Türkmenistanyň Köpetdag etrap kazyýetiniň, Türkmenistanyň Magtymguly adyndaky Ýaşlar guramasynyň wekilleri, şeýle hem institutymyzyň mugallymlary we talyplary gatnaşdylar.
Çykyş edenler ýaşlarda milli mirasymyza bolan sarpany kemala getirmek, sagdyn durmuş ýörelgesine eýermek, watansöýüjilik, edermenlik, arassa ahlaklylyk, halallyk, zähmetsöýerlik ýaly häsiýetleri terbiýelemek maksady bilen, durmuşdan alnan mysallar arkaly çykyş etdiler. Şeýle hem çykyşlarda Gahryman Arkadagymyzyň başlangyjy bilen hormatly Prezidentimiziň ýolbaşçylygynda häzirki zaman türkmen jemgyýetinde ylymly-bilimli ýaş nesli kemala getirmek, olary milli ruhda terbiýelemek üçin alnyp barylýan işler barada hem aýratyn durup geçdiler.
Duşuşygyň institutymyzyň döredijilik topary tarapyndan taýýarlanan aýdym-sazly çykyşlar bilen utgaşmagy bu ajaýyp güne has-da täsirli öwüşgin çaýdy.
Duşuşygyň ahyrynda oňa gatnaşyjylar güneşli Diýarymyzy bagtyýar nesilleriň iň arzyly arzuwdyr islegleriniň hasyl bolýan mekanyna öwren, jemgyýetçilik durmuşynyň ähli ugurlarynda kanunlaryň hökmürowanlygy, döwletiň kanun çykaryjy edarasy tarapyndan döwletiň adyndan kabul edilýän kanunlaryň adalatlylyk, ynsanperwerlik, halk häkimiýetliligi, deňhukuklylyk, ynsanyň tebigy hem mizemez hukuklarynyň eldegrilmesizligi ýaly umumy ykrar edilen hukuk ýörelgelerini üpjün edýän hormatly Prezidentimize, türkmen halkynyň Milli Lideri Gahryman Arkadagymyza çäksiz alkyş sözlerini aýtdylar.
Intizar TAGANNYÝAZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.