“Türkmenistanyň halkara ykdysady hyzmatdaşlygy:gazanylan tejribe we ösüşiň geljegi” atly halkara maslahaty
2022-nji ýylyň 20-nji sentýabrynda Türkmenistanyň Daşary işler ministrliginiň Halkara gatnaşyklary institutynyň uly mejlisler zalynda “Türkmenistanyň halkara ykdysady hyzmatdaşlygy: gazanylan tejribe we ösüşiň geljegi” atly halkara maslahaty geçirildi. Maslahaty Türkmenistanyň Daşary işler ministrliginiň Halkara gatnaşyklary institutynyň rektory, taryh ylymlarynyň kandidaty J.Gurbangeldiýew alyp bardy. Maslahata Türkmenistanyň Daşary işler ministrliginiň we konsullyk edaralarynyň wekilleri, Halkara ynsanperwer ylymlary we ösüş uniwersitetiniň rektory Esen Aýdogdyýew, Ýewropanyň Ösüş we Täzeleniş bankynyň Türkmenistandaky wekilhanasynyň ýolbaşçysy Fatih Türkmenoglu, Aziýa Ösüş Bankynyň Türkmenistandaky wekilhanasynyň ýolbaşçysy Artur Andrysiaka, Russiýa Federasiýasynyň Türkmenistandaky Adatdan daşary we doly ygtyýarly ilçisi Blohin Aleksandr Wiktorowiç, Hytaý Halk Respublikasynyň Türkmenistandaky Adatdan daşary we doly ygtyýarly ilçisi Sýan Naýçen, Amerikanyň Birleşen Ştatlarynyň Türkmenistandaky Adatdan daşary we doly ygtyýarly ilçisi Metýu Stefen Klimow, Türkmenistanyň Daşary işler ministrliginiň Halkara gatnaşyklary institutynyň şeýle-de beýleki ýokary okuw mekdepleriň professor-mugallymlary we talyp ýaşlary, ýurdumyzyň habar beriş serişdeleriniň wekilleri gatnaşdylar.
Halkara maslahatyň dowamynda çykyş edenler dünýä döwletleri bilen ykdysady hyzmatdaşlygy ýola goýmakda we pugtalandyrmakda Türkmenistanyň Garaşsyzlyk ýyllary içinde alyp baran ynsanperwer syýasatynyň ähmiýeti dogrusynda, hormatly Prezidentimiziň ýolbaşçylygynda gazanylan sepgitler barada durup geçdiler. Maslahatyň ahyrynda oňa gatnaşyjylar Gahryman Arkadagymyza, Arkadagly Serdarymyza uzak ömür, jan-saglyk, daşary syýasy başlangyçlarynyň mundan beýläk hem rowaçlyklara beslenmegini arzuw etdiler.
Resul GYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň
II ýyl talyby.