TÜRKMENISTANYŇ HALK MASLAHATYNYŇ MEJLISINIŇ ÄHMIÝETINE BAGYŞLANAN MASLAHAT
2023-nji ýylyň 4-nji oktýabrynda Türkmenistanyň Daşary işler ministrligi tarapyndan Halkara gatnaşyklary institutynda Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň we Arkadagly Gahryman Serdarymyzyň gatnaşmagynda geçirilen Türkmenistanyň Halk Maslahatynyň mejlisine bagyşlanan «Türkmen halkynyň Milli Lideriniň nusgalyk döwlet taglymaty we Arkadagly Gahryman Serdarymyzyň ýoly bilen beýik geljege tarap» atly maslahat geçirildi. Oňa Türkmenistanyň Daşary işler ministrliginiň, ýurdumyzyň syýasy partiýalarynyň, iri jemgyýetçilik guramalarynyň işgärleri, Halkara gatnaşyklary institutynyň we Halkara ynsanperwer ylymlary we ösüş uniwersitetiniň professor-mugallymlary, talyp ýaşlary gatnaşdylar.
Maslahat Türkmenistanyň Daşary işler ministrliginiň Halkara gatnaşyklary institutynyň talyplary tarapyndan taýýarlanan «Parahatçylygyň ýaş çaparlary biz!» atly edebi-sazly kompozisiýa bilen başlandy. Maslahatyň dowamynda Türkmenistanyň Ministrler Kabinetiniň başlygynyň orunbasary, Daşary işler ministri R.Meredowyň, ÝUNESKO-nyň işleri boýunça Türkmenistanyň milli toparynyň jogapkär sekretary, Türkmenistanyň Gahrymany Ç. Rustemowanyň, Halkara gatnaşyklary institutynyň rektory J.Gurbangeldiýewiň, Halkara ynsanperwer ylymlary we ösüş uniwersitetiniň rektory E.Aýdogdyýewiň, institutyň okuw işleri boýunça prorektory G.Ýusupowanyň, Magtymguly adyndaky Türkmen döwlet uniwersitetiniň Jemgyýetçilik ylymlary kafedrasynyň müdiri, professor A.Burynowyň, Türkmen Döwlet ykdysadyýet we dolandyryş institutynyň mugallymy A.Gurbannazarowyň çykyşlary diňlenildi. Maslahatda Gahryman Arkadagymyzyň we Arkadagly Gahryman Serdarymyzyň Türkmenistanyň Halk Maslahatynyň mejlisinde eden taryhy çykyşynyň ähmiýetine uly orun berildi.
Çykyş edenler Türkmenistanyň Halk Maslahaty halk häkimiýetiniň iň ýokary wekilçilikli edarasy bolmak bilen, Garaşsyz, hemişelik Bitarap döwletimizde halk bilen geňeşmegiň — Halk Maslahatlaryny yzygiderli geçirmegiň indi däbe öwrülendigini bellediler. Şeýle-de maslahatda Türkmenistanyň Halk Maslahatynyň mejlisinde daşary syýasat bilen bagly öňe sürlen başlangyçlara üns berlip, olaryň durmuşa geçirilmegi bilen bagly çykyşlar giňden ýaýbaňlandyryldy. Çykyş edenler güneşli Diýarymyzy bagtyýar nesilleriň arzuwdyr islegleriniň hasyl bolýan mekanyna öwren Gahryman Arkadagymyzyň, hormatly Prezidentimiziň janlarynyň sag, ömürleriniň uzak bolmagyny arzuw etdiler.
Halk Maslahatynyň mejlisiniň ähmiýetine bagyşlanan maslahatda edilen çykyşlardan soňra Türkmenistanyň Daşary işler ministrliginiň Halkara gatnaşyklary institutynyň çeper-höwesjeňleriniň ýerine ýetirmeginde “Arkadagly Gahryman Serdar bilen” diýen aýdym ýerine ýetirildi.
Maslahatyň ahyrynda «Türkmen halkynyň Milli Lideriniň nusgalyk döwlet taglymaty we Arkadagly Gahryman Serdarymyzyň ýoly bilen beýik geljege tarap» atly maslahata gatnaşyjylaryň adyndan Türkmenistanyň hormatly Prezidentine Ýüzlenme kabul edildi.
Aýgözel AŞIROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň öwreniji-mugallymy.
Şeýle hem bu barada şu ýerden
okap bilersiňiz: