TÜRKMENISTANYŇ GARAŞSYZLYK BAÝRAMY EÝRANDA GIŇDEN BELLENILDI
2025-nji ýylyň 27-nji sentýabrynda Türkmenistanyň Eýran Yslam Respublikasyndaky Ilçihanasy tarapyndan Türkmenistanyň Garaşsyzlygynyň 34 ýyllyk baýramy mynasybetli Tähran şäheriniň Azady meýdanynda Türkmenistanyň baýdagynyň görkeziliş dabarasy geçirildi.
Bu çäräniň dowamynda ýurdumyzyň Döwlet senasy we türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň «Öňe, öňe, diňe öňe jan Watanym Türkmenistan» diýen aýdymy ýaňlandy.
Geçirilen bu dabara Eýran Yslam Respublikasynyň Daşary işler ministrliginiň, Tähran şäheriniň häkimliginiň, ýerli dolandyryş edaralarynyň wekilleri gatnaşdylar.
Mundan başga-da, 2025-nji ýylyň 30-njy sentýabrynda Ykdysady Hyzmatdaşlyk Guramasynyň Medeniýet institutynda Türkmenistanyň Eýran Yslam Respublikasyndaky Ilçihanasy tarapyndan Türkmenistanyň Garaşsyzlygynyň 34 ýyllyk baýramy mynasybetli «Parahatçylyk we ynanyşmak syýasaty – halkara howpsuzlygyň, durnuklylygyň we ösüşiň binýady» atly maslahat geçirildi.
Maslahata Ykdysady Hyzmatdaşlyk Guramasynyň Baş sekretary we onuň orunbasarlary, Eýran Yslam Respublikasynyň Daşary işler ministrliginiň wekilleri, bu ýurduň Yslam Şurasy Mejlisiniň deputatlary, Eýranda akkreditlenen daşary ýurt ilçileri hem-de hormatly myhmanlar gatnaşdylar.
Çäräň dowamynda Türkmenistanyň Eýran Yslam Respublikasyndaky ilçisi, Ykdysady Hyzmatdaşlyk Guramasynyň Baş sekretary, Eýran Yslam Respublikasynyň Daşary işler ministriniň kömekçisi, Ýewraziýa departamentiniň başlygy, Eýranyň Yslam Şurasy Mejlisiniň deputaty, türkmen-eýran dostluk toparynyň ýolbaşçysy hem-de edebiýatçylar çykyş etdiler. Onda Türkmenistanyň Garaşsyzlygynyň 34 ýyllygy mynasybetli gutlag sözleri aýdyldy hem-de ýurdumyzyň gazanan üstünlikleri, ykdysady kuwwatynyň ýokarlanmagy, syýasy taýdan durnuklylygy barada bellenilip geçildi. Şeýle-de, şu ýylyň 19-njy sentýabrynda geçirilen Türkmenistanyň Halk Maslahatynyň nobatdaky mejlisiniň ähmiýeti barada bellenilip geçildi.
Maslahatyň dowamynda medeniýet toparynyň ýerine ýetirmeginde türkmen milli aýdym-saz, medeni çykyşlary görkezildi. Çäräniň çäklerinde türkmen halkynyň medeniýetini, milli mirasyny we şekillendiriş sungatyny açyp görkezýän sergi geçirildi hem-de türkmeniň milli tagamlary hödürlenildi.
Bu geçirilen çärelerde Türkmenistanyň Eýran Yslam Respublikasyndaky Ilçihanasynyň agzybir işgärleri bilen bilelikde Türkmenistanyň Daşary işler ministrliginiň Halkara gatnaşyklary institutynyň, şol ýerde önümçilik tejribeligini geçýän talyplary hem işjeň gatnaşdylar.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 5-nji ýyl talyby.