Türkmenistanyň Garaşsyzlygynyň 33 ýyllygy mynasybetli ýurdumyzyň ykdysady üstünlikleriniň sergisi
2024-nji ýylyň 19-njy sentýabrynda paýtagtymyzda ýurdumyzyň Garaşsyzlygynyň 33 ýyllygy mynasybetli Türkmenistanyň ykdysady üstünlikleriniň sergisi öz işine başlady. Sergä ýurdumyzyň dürli pudaklarynda zähmet çekýän ildeşlerimiz, paýtagtymyzyň ýaşaýjylary, myhmanlar hem-de türkmen diplomatiýasynyň milli mekdebiniň mugallymlary, talyp ýaşlary gatnaşdylar.
Bu sergi “Garagum” myhmanhanasynyň arkasyndaky sergi meýdançasynda ýaýbaňlandyryldy. Onda milli ykdysadyýetimiziň ähli pudaklaryny döwrebaplaşdyrmak we diwersifikasiýalaşdyrmak boýunça alnyp barylýan işleri, döwlet maksatnamalarynyň we innowasion taslamalaryň çäklerinde üstünlikli amala aşyrylýan çäreleri giňişleýin şöhlelendirýän pudaklaýyn diwarlyklar ýerleşdirilipdir.
Ýurdumyzyň bilim ulgamynda, söwda we hyzmatlar, elektroenergetika, senagat-gurluşyk pudaklarynda gazanylan üstünlikleri giňişleýin açyp görkezýän diwarlyklar sergä gelenlerde uly gyzyklanma döretdi.
Şahnoza ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.