TÜRKMENISTANYŇ EKOLOGIÝA SYÝASATYNA BAGYŞLANAN SURAT BÄSLEŞIGI GEÇIRILDI
2026-njy ýylyň 15-nji maýynda Türkmenistanyň Daşary işler ministrliginiň Halkara gatnaşyklary institutynda «Ýaş diplomatlar» ylmy gurnagynyň guramagynda hyzmatdaş mekdepleriň okuwçylarynyň arasynda «Türkmenistanyň ekologiýa syýasaty» atly surat çekmek bäsleşigi geçirildi. Oňa mekdep okuwçylary uly işjeňlik bilen gatnaşdylar.
Bu döredijilikli çäräniň esasy maksady ýaş nesliň arasynda ýurdumyzyň ekologiýa syýasatynyň ähmiýetini düşündirmek, tebigaty goramaga bolan söýgini artdyrmak hem-de okuwçylaryň surat çekmek sungatyna bolan ukyplaryny ýüze çykarmakdan ybarat boldy. Bäsleşige hödürlenen işlerde Türkmenistanyň gözel tebigatyny, daşky gurşawyny goramak boýunça amala aşyrylýan döwlet maksatnamalary we arassaçylyk kadalary ýokary çeperçilik bilen beýan edildi.
Emin agzalary tarapyndan işleriň özboluşlylygy, reňk öwüşginleri we mowzuklaýyn mazmuny öwrenilip, bäsleşigiň netijeleri boýunça iň ýokary ussatlyk görkezen ýaşlar ýeňiji diýlip yglan edildi. Bäsleşige işjeň gatnaşan okuwçylara we ýeňijilere Hormat hatlary hem-de ýadygärlik sowgatlary dabaraly ýagdaýda gowşurylyp, olaryň geljekki okuwlarynda, döredijilikli işlerinde täze üstünlikler arzuw edildi.
Mähri DURDYNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby