Türkmenistanyň ekologiýa diplomatiýasy
2021-nji ýylyň 14-nji oktýabrynda Türkmenistanyň Daşary işler ministrliginiň Halkara gatnaşyklary institutynda Ekologiýa we daşky gurşawy goramak dersinden Halkara ykdysady gatnaşyklary kafedrasynyň mugallymy Rahym Bäşimowyň we Jemgyýeti öwreniş ylymlary kafedrasynyň uly mugallymy, filosofiýa ylymlarynyň kandidaty Ogulgurban Ezimowanyň alyp barmagynda açyk sapak-duşuşygy geçirildi. Açyk sapaga institutymyzyň Halkara gatnaşyklary, Halkara hukugy, Halkara ykdysady gatnaşyklary, Halkara žurnalistikasy fakultetleriniň 2-nji ýyl talyplary we institutymyzyň halypa mugallymlary gatnaşdy.
Duşuşyk görnüşinde geçirilen açyk sapagyň başynda Halkara ykdysady gatnaşyklary kafedrasynyň mugallymy Rahym Bäşimow biosfera baradaky taglymat we onuň ösüşiniň esasy ugurlary, tebigatda maddalaryň aýlanyşy, biosferany goramak meselesi barada çykyş etdi. Açyk sapagyň dowamynda Jemgyýeti öwreniş ylymlary kafedrasynyň uly mugallymy, filosofiýa ylymlarynyň kandidaty Ogulgurban Ezimowa çykyş edip, ekologiýa ylmy, onuň ugurlary, daşky gurşawy goramagyň ylmy esaslary, ekologiýa babatynda kabul edilen kanunlar, tebigat bilen jemgyýetiň özara baglanyşygy we Türkmenistanyň dünýäde ekologiýa howpsuzlygyny üpjün etmek, daş-töweregi goramak meseleleri babatda alnyp barylýan döwlet syýasaty barada sanly bilim ulgamynyň mümkinçiliklerinden peýdalanyp, tanyşdyryş arkaly giňişleýin maglumat berdi.
Sapak örän täsirli geçdi. Talyplar ýurdumyzyň daşky gurşawyny goramak babatynda täsin we gyzykly maglumatlar bilen tanyş boldular.
Bilbil BERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň
II ýyl talyby.