TÜRKMENISTANYŇ DÖWLET MEDENIÝET MERKEZINIŇ DÖWLET KITAPHANASYNDA DABARA GEÇIRILDI
2025-nji ýylyň 10-njy fewralynda Hindistan Respublikasynyň Türkmenistandaky ilçihanasynyň guramagynda Türkmenistanyň Döwlet medeniýet merkeziniň Döwlet kitaphanasynda Türkmenistanda Hindi tehniki we ykdysady hyzmatdaşlyk maksatnamasynyň (ITEC) güni dabaraly ýagdaýda geçirildi. Bu dabara maksatnamanyň esasynda guralan okuw maslahatlaryna gatnaşan wekiller, şol sanda Türkmenistanyň Daşary işler ministrliginiň Halkara gatnaşyklary institutynyň mugallymlary gatnaşdylar.
Dabaranyň dowamynda Hindi tehniki we ykdysady hyzmatdaşlyk maksatnamasyna gatnaşanlaryň çykyşlary, wideoşekilleri we prezentasiýalary görkezildi. Dabaranyň ahyrynda oňa gatnaşyjylara Hindistan Respublikasynyň Adatdan daşary we Doly ygtyýarly ilçisi Madhumita Bhagat Hindi tehniki we ykdysady hyzmatdaşlyk maksatnamasyna işjeň gatnaşanlara öz minnetdarlygyny bildirdi.
Dabaradan soň Aşgabat şäheriniň Mukamlar köşgünde hindi diasporasynyň gününe hem-de aktýor we režissýor Raj Kapuryň 100 ýyllygyna bagyşlanyp hindi filmleriň rowaýata öwrülen sazlary ýaňlandy.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy.