«TÜRKMENISTANYŇ DIPLOMATIK IŞGÄRLERINIŇ GÜNI MYNASYBETLI BAÝRAMÇYLYK MASLAHATY GEÇIRILDI
2024-nji ýylyň 15-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatik işgärleriniň güni mynasybetli «Garaşsyz, hemişelik Bitarap Türkmenistan: parahatçylygy we durnuklylygy üpjün etmek ýoly bilen!» atly baýramçylyk maslahaty geçirildi. Oňa Türkmenistanyň Demokratik partiýasynyň Syýasy Geňeşiniň, Türkmenistanyň Magtymguly adyndaky Ýaşlar guramasynyň Merkezi Geňeşiniň wekilleri, institutymyzyň halypa diplomatlary we talyp ýaşlary gatnaşdylar.
Maslahatda Türkmenistanyň Demokratik partiýasynyň Syýasy Geňeşiniň bölüm müdiri Bezirgen Ataýew, Türkmenistanyň Magtymguly adyndaky Ýaşlar guramasynyň Merkezi Geňeşiniň bölüm müdiri Gurbanmyrat Muhammedow, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, Türkmenistanyň Adatdan daşary we Doly ygtyýarly Ilçisi Sapar Berdinyýazow, şeýle-de institutymyzyň Halkara gatnaşyklary fakultetiniň talyby Arslan Syýahatow dagy çykyş etdiler.
Çykyş edenler ata-babalarymyzdan miras galan däp-dessurlarymyzyň esasynda mynasyp nesilleri terbiýeläp ýetişdirmekde hormatly Prezidentimiziň alyp barýan döwlet syýasatynyň çäklerinde ähli mümkinçilikleriň we şertleriň döredilýändigi, häzirki döwürde ýurdumyzyň geljegi bolan ýaşlara ählitaraplaýyn goldaw berilýändigi barada nygtap geçdiler.
Şeýle-de Türkmenistanyň diplomatik işgärleriniň güni mynasybetli geçirilen baýramçylyk maslahatyň çäklerinde Türkmen diplomatiýasynyň milli mekdebinde zähmet çekýän halypa diplomatlara, mugallymlara we talyp ýaşlara ýörite hormat hatlar we gymmat bahaly sowgatlar gowşuryldy.
Durdynýaz GUWANJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.