Türkmenistan-ÝUNESKO hyzmatdaşlygy barada okuw sapagy geçirildi
2022-nji ýylyň 26-njy dekabrynda Türkmenistanyň Daşary işler ministrliginiň Halkara gatnaşyklary institutynda ÝUNESKO bilen baglanyşykly Türkmenistanyň Fransiýa Respublikasyndaky Adatdan Daşary we Doly ygtyýarly ilçisi, şol bir wagtyň özünde ÝUNESKO-nyň ýanyndaky Türkmenistanyň hemişelik wekili Maksat Esenowiç Çaryýewiň, şeýle-de institutymyzyň halypa mugallymlarynyň we talyp ýaşlarynyň gatnaşmagynda okuw sapagy geçirildi.
Öz çykyşynyň dowamynda ilçi talyplara ÝUNESKO-nyň alyp barýan işleri, onuň häzirki wagtda döwletleriň arasyndaky oňyn hyzmatdaşlygy medeniýetiň, ylymyň we bilimiň üsti bilen gazanmaklygy baş maksat edinýändigini, şeýle hem ÝUNESKO-nyň işleri barada Türkmenistanyň milli toparynyň Sekretariatynyň bu ugurda alyp barýan işleri barada giňişleýin gürrüň berdi. Okuw sapagynyň dowamynda talyplar hormatly ilçä ÝUNESKO bilen baglanyşykly şeýle hem daşary syýasat barada özlerini gyzyklandyrýan soraglaryny berdiler. Okuw sapagynyň soňunda oňa gatnaşyjylar institutymyzyň çäginde hereket edýän “Parahatçylyk medeniýeti” atly ÝUNESKO klubyna hem baryp gördiler.
Kerim BAÝMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.