Türkmenistan - ruhubelentligiň we sagdynlygyň ýurdy
Berkarar döwletiň täze eýýamynyň Galkynyşy döwründe ýurdumyzda sport ussatlygynyň hili has hem kämilleşdirilýär. Muny türkmen türgenleriniň dürli derejedäki halkara ýaryşlaryndaky gazanan üstünlikleri hem tassyklaýar. Bularyň hemmesi dünýäde Türkmenistanyň sport ulgamyndaky abraýyny has hem ýokarlandyrýar we berkidýär. Sporty giňden ösdürmekde we häzirki zaman türkmen jemgyýetinde zyýanly endikleriň öňüni almakda wajyp orun eýeleýän sagdyn durmuş ýörelgesini işjeň wagyz etmek döwlet syýasatynyň ileri tutulýan ugurlarynyň birine öwrüldi. Şonuň bilen bir hatarda ýurdumyzda diňe bir ýaşlar babatynda däl eýsem uly ýaşlylaryň sagdyn ýaşamagy ugrunda hem birnäçe aladalar edilýär. Hut şonuň üçin köpçülikleýin bedenterbiýäni we ýokary netijeli sporty ösdürmek Türkmenistan döwletimizde durmuşa geçirilýän döwlet syýasatynyň ileri tutulýan ugurlarynyň birine öwrüldi. Bu ugurda eýýäm däbe öwrülen "Türkmenistan - ruhubelentligiň we sagdynlygyň ýurdy" şygary bilen ýokary okuw mekdepleriniň talyplarynyň hem-de professor-mugallymlarynyň arasynda geçirilýän sport ýaryşlary eýýam birnäçe ýyl bäri gyzgylaňly geçirilip gelinýär.
2023-nji ýylyň 13-nji ýanwarynda Türkmenistanyň Daşary işler ministrliginiň Halkara gatnaşyklary institutynyň sport toplumynda sportuň woleýbol görnüşi boýunça zenan mugallymlaryň arasyndaky ýaryşlaryň final oýunlary geçirildi. Bu geçirilen ýaryş çekeleşikli häsiýete eýe bolup, oýnuň dowamynda 3-nji ýeri eýelemek ugrundaky oýunda Döwletmämmet Azady adyndaky Türkmen milli dünýä dilleri instituty hem-de Ýagşygeldi Kakaýew adyndaky Halkara nebit we gaz uniwersitetiniň talyp ýaşlary we professor-mugallymlary ýaryşdylar. Onda Döwletmämmet Azady adyndaky Türkmen milli dünýä dilleri instituty bu oýunda ýeňiş gazanyp, 3-nji ýere mynasyp boldy.
Ýaryşyň final oýny örän gyzykly we çekeleşikli häsiýetliligi bilen tapawutlandy. Türkmen Döwlet bedenterbiýe we sport instituty hem-de Türkmen Döwlet binagärlik-gurluşyk institutynyň arasynda bolan oýunda iki tarapyň zenan mugallymlaryndan düzülen toparlary örän taýýarlykly gelip, diýseň täsirli oýun görkezdiler. Netijede, Türkmen Döwlet binagärlik-gurluşyk institutynyň topary ýaryşyň ýeňijisi boldy. Türkmen Döwlet bedenterbiýe we sport instituty bolsa ikinji ýeri eýelemegi başardy.
Oguljahan JOBBOROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 2-nji ýyl talyby.