“TÜRKMENISTAN – ÖZBEGISTAN: STRATEGIK HYZMATDAŞLYGYŇ TÄZE GÖZÝETIMLERI” ATLY “TEGELEK STOL” FORMATYNDA DUŞUŞYK GEÇIRILDI
Garaşsyz, hemişelik Bitarap Türkmenistan Merkezi Aziýada ählumumy parahatçylygyň, howpsuzlygyň hem durnukly ösüşiň bähbidine goňşy döwletleriň ählisi bilen özara gatnaşyklary has-da işjeňleşdirmek ugrunda çykyş edýär. Döwletimiziň özara bähbitli gatnaşyklarynyň köptaraplylygy bilen tapawutlanýan strategik hyzmatdaşlarynyň biri-de Özbegistan Respublikasydyr. Iki döwletiň arasyndaky dürli ugurlardaky hyzmatdaşlyk ýyl-ýyldan has-da pugtalanýar. Muňa mysal hökmünde 2025-nji ýylyň 9-njy oktýabrynda Türkmenistanyň Daşary işler ministrliginiň Halkara gatnaşyklary institutynda “Türkmenistan – Özbegistan: strategik hyzmatdaşlygyň täze gözýetimleri” atly “tegelek stol” formatynda geçirilen duşuşygy bellemek bolar. Oňa Strategik barlaglar boýunça ylmy merkeziň bilermenleri, Özegistan Respublikasyndaky Halkara Merkezi Aziýa institutynyň wekilleri hem-de institutymyzyň bu ugurda iş alyp barýan professor-mugallymlary gatnaşdylar.
Duşuşygy Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň uly ylmy işgäri Bekdurdy Amansaryýew alyp bardy. Oňa özbek tarapyndan Özbegistan Respublikasynyň Prezidentiniň Daşary syýasy meseleler boýunça maslahatçysynyň orunbasary, Halkara Merkezi Aziýa institutynyň direktory Žawlon Wahabow, Özbegistan Respublikasynyň Türkmenistandaky Adatdan daşary we Doly ygtyýarly ilçisi Rawşanbek Alymow, Halkara Merkezi Aziýa institutynyň bölüm başlygy Daniýar Kurbanow, Halkara Merkezi Aziýa institutynyň ylmy işgäri Sultanbek Satmuratow, Özbegistan Respublikasynyň Türkmenistandaky Ilçihanasynyň hünärmeni Jasur Aşurow, türkmen tarapyndan bolsa Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň başlygy Şiri Şiriýew, şeýle hem bu merkeziň ylmy işgärleri Allaberdi Niýazow, Orazmuhammet Annabaýew, Türkmenistanyň ulag-logistika merkeziniň demir ýol gatnawlar merkeziniň başlygy Wepa Ýagşyýew, “At abraý” hojalyk jemgyýetiniň başlygy Serdarmyrat Geldiýew dagylar gatnaşdy. Duşuşyga köpçülikleýin habar beriş serişdeleriniň wekilleriniň hem gatnaşmagy oňa aýratyn öwüşgin berdi.
Onuň barşynda syýasy-diplomatik, söwda-ykdysady, medeni-ynsanperwer ugurlar boýunça türkmen-özbek hyzmatdaşlygyny mundan beýläk-de ösdürmegiň möhüm meseleleri ara alnyp maslahatlaşyldy. Şeýle hem sebitara we halkara gün tertibiniň möhüm meseleleri, şol sanda ikitaraplaýyn we köptaraplaýyn formatlaryň çäklerinde meýilleşdirilýän çäreler barada pikir alyşdylar. Sebit we halkara guramalaryň, hususan-da BMG-niň çägindäki hyzmatdaşlygyň orny barada bellenildi. Şeýle-de duşuşyga gatnaşanlar medeni-ynsanperwer gatnaşyklaryň esasy ugurlary hakynda durup geçdiler.
“Tegelek stol” duşuşygy tamamlandan soň Özbegistan Respublikasynyň Prezidentiniň Daşary syýasy meseleler boýunça maslahatçysynyň orunbasary, Merkezi Aziýa halkara institutynyň direktory Žawlon Wahabowyň ýolbaşçylygyndaky wekiliýetiň hem-de Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowanyň arasynda ikitaraplaýyn duşuşyk geçirildi. Myhman soňky ýyllarda Türkmenistan bilen Özbegistan Respublikasynyň arasyndaky strategiki hyzmatdaşlygyň hil taýdan täze derejä çykarylýandygyny aýratyn nygtady. Duşuşyga gatnaşanlar öňde goýlan maksatlara ýetiljekdine ýenede-bir gezek uly ynam bildirdiler.
Sahydöwlet HÜMMETJUMAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.
Şeýle hem şu ýerden okap bilersiňiz:
https://turkmenistan.gov.tm/ru/post/99464/turkmenistan-uzbekistan-novye-gorizonty-sotrudnichestva
https://orient.tm/ru/post/91348/ashgabat-tashkent-dialog-analityka