«Türkmenistan – kuwwatly energetika döwleti» atly okuw sapagy geçirildi
2022-nji ýylyň 28-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň “Energetika diplomatiýasy” ugruna degişli “Türkmenistan – kuwwatly energetika döwleti” atly ylmy temasy boýunça okuw sapagy geçirildi. Bu sapaga institutyň Halkara gatnaşyklary we diplomatiýa kafedrasynyň mugallymy Akmuhammet Jumagulyýew we talyplar gatnaşdy.
Häzirki zamanda ýurdumyzyň diplomatiýasynyň esasy ugry bolan energetika diplomatiýasynyň täsiri artýar. Energetika diplomatiýasy halkara giňişliginde döwletleriň syýasy hem-de ykdysady bähbitlerini öňe sürmeginiň guraly bolup durýar. Hut şonuň üçinem energetika howpsuzlygy ählumumy syýasatyň ileri tutulýan ugurlarynyň biri bolup, ol oňyn halkara gatnaşyklary talap edýär we durnukly ösüşiň çeşmesi bolup hyzmat edýär. Okuw sapagynyň dowamynda Türkmenistanyň Energetika diplomatiýasyny ösdürmegiň 2021-2025-nji ýyllar üçin maksatnamasyny durmuşa geçirmekligiň ähmiýeti barada aýratyn nygtalyp geçildi.
Maral KARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby.