TÜRKMENISTAN — EÝRAN: özara bähbitli söwda-ykdysady hyzmatdaşlyk ösdürilýär
Türkmenistanyň iň ýakyn goňşusy bolan we umumy taryhy kökleri müňýyllyklaryň jümmüşinden gözbaş alýan dostlukly döwletleriniň biri hem Eýran Yslam Respublikasydyr. Iki döwletiň arasynda 1992-nji ýylyň 18-nji fewralynda diplomatik gatnaşyklar ýola goýuldy. Şol ýyllardan bäri toplanan baý tejribe iki döwletiň arasynda söwda-ykdysady, ylym-bilim we medeni-ynsanperwer ugurlarda alnyp barylýan özara gatnaşyklaryň has-da giňemegine itergi berýär.
2023-nji ýylyň 17-18-nji noýabrynda Aşgabatda Ykdysady hyzmatdaşlyk boýunça türkmen-eýran hökümetara toparynyň 17-nji mejlisiniň geçirilmegi we dostlukly goňşy ýurduň «Iran Prože» atly ýöriteleşdirilen sergisiniň açylmagy Türkmenistan bilen Eýranyň ara¬syndaky özara bähbitli hyzmatdaşlygy ösdürmegiň ýene bir aýdyň mysalydyr. Giň gerimli sergide Eýran Yslam Respublikasynyň 100-e golaý kompaniýalarynyň önümleri we hyzmatlary barada umumy maglumatlar berildi. Hünärmenleriň pikirine görä, şunuň ýaly sergileriň geçirilmegi, umuman alanyňda, türkmen döwletiniň ägirt uly ykdysady kuwwatyna şaýatlyk edip, onuň özara bähbitli ykdysady hyzmatdaşlyk üçin açyklygynyň we dünýä ykdysady giňişligine işjeň goşulmaga taýýardygynyň subutnamasydyr.
Serginiň we işewürlik forumynyň çäginde Türkmenistanyň we Eýranyň işewür toparlarynyň wekilleri hyzmatdaşlygy mundan beýläk-de ösdürmek we çuňlaşdyrmak üçin birnäçe duşuşyklary we gepleşikleri geçirdiler. Gepleşikleriň netijesinde iki ýurduň telekeçileriniň arasynda däp bolan netijeli gatnaşyklary berkitmäge gönükdirilen ikitaraplaýyn resminamalara gol çekildi.
Şeýle hem, 2023-nji ýylyň 17-18-nji noýabrynda Aşgabatda Ykdysady hyzmatdaşlyk boýunça türkmen-eýran hökümetara toparynyň 17-nji mejlisiniň jemleri boýunça birnäçe resminamalara, ýagny:
• Ykdysady hyzmatdaşlyk boýunça türkmen-eýran Hökümetara toparynyň 17-nji mejlisiniň Teswirnamasyna;
• Mary (Türkmenistan) - Maşat (Eýran) elektrik geçirijisiniň türkmen böleginiň gurluşygynyň maliýeleşdirilmegini ýola goýmak hakynda «Türkmenenergo» döwlet elektroenergetika korporasiýasynyň, «Tawanir» kompaniýasynyň we «Sanergy Pishro Export and Energy Promotion» kompaniýasynyň arasynda Çarçuwaly ylalaşyga;
•Awtomobil ýollarynyň gurluşygyny dolandyrmak baradaky döwlet agentligi bilen Eýran Yslam Respublikasynyň Ýol we şäher gurluşyk ministrliginiň arasynda «Gumdag¬¬–Etrek–Eýran serhedi» awtomobil ýoluny gurmak barada Hyzmatdaşlyk hakynda Ähtnama gol çekilmegi, taraplaryň arasynda söwda-ykdysady hyzmatdaşlygynyň ösüş depginlerine oňyn täsirini ýetirer.
Aýmyrat MUHAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklar hünäriniň I ýyl talyby.