Türkmenistan – BMG: hukuk ulgamynda hyzmatdaşlyk
2022-nji ýylyň 3-nji martynda «Erkekler öz hukugy hakynda nämeleri bilmeli?» atly onlaýn gepleşigi geçirildi. Bu onlaýn gepleşigine Birleşen Milletler Guramasynyň Ilat gaznasynyň (UNFPA), Türkmenistanyň Magtymguly adyndaky Ýaşlar Guramasynyň Merkezi Geňeşiniň, Türkmenistanyň Sport we ýaşlar syýasaty ministrliginiň we onuň welaýat düzüm birlikleriniň, Türkmenistanyň Zähmet we ilaty durmuş taýdan goramak ministrliginiň, Türkmenistanyň Zenanlar birleşiginiň Merkezi hem-de welaýat Geňeşleriniň, Türkmenistanyň Gyzyl Ýarymaý Milli jemgyýetiniň wekilleri, şeýle hem Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, Myrat Garryýew adyndaky Türkmenistanyň Döwlet lukmançylyk uniwersitetiniň, Türkmen döwlet ykdysadyýet we dolandyryş institutynyň, Maýa Kulyýewa adyndaky Türkmen milli konserwatoriýasynyň, Halkara ynsanperwer ylymlary we ösüş uniwersitetiniň mugallymlary we talyp ýaşlary gatnaşdylar.
Onlaýn gepleşigiň dowamynda gender deňligi, ýaşlaryň hukuklary we borçlary hakynda, hususan-da, maşgalada, işde we jemgyýetde deňhukuklylygy öňe sürmekde erkekleriň şol ugurda geçirilýän çärelere işjeň gatnaşmagyny gazanmak bilen bagly çykyşlar edildi.
Beggeldi GUTLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň talyby.