TÜRKMENISTAN - AZERBAÝJAN: diplomatik ÝOM-niň arasyndaky teleköpri
2022-nji ýylyň 7-nji iýunynda Türkmenistanyň Daşary işler ministrliginiň Halkara gatnaşyklary instituty bilen Azerbaýjanyň ADA uniwersitetiniň arasynda iki döwletiň arasynda diplomatik gatnaşyklaryň ýola goýulmagynyň 30 ýyllygy mynasybetli teleköpri geçirildi. Oňa Türkmenistanyň we Azerbaýjanyň Daşary işler ministrlikleriniň, ady agzalan ýokary okuw mekdepleriň wekilleri, Merkezi Aziýa döwletleriniň Azerbaýjandaky ilçileri we talyp ýaşlar gatnaşdylar.
Bilşimiz ýaly, Türkmenistan bilen Azerbaýjanyň arasynda diplomatik gatnaşyklar 1992-nji ýylyň 9-njy iýunynda ýola goýuldy. Teleköprüni Azerbaýjanyň ADA uniwersitetiniň wekili Aýgun Hajyýewa gutlag sözi bilen açdy. Onuň başynda Türkmenistanyň Azerbaýjan Respublikasyndaky Adatdan daşary we Doly ygtyýarly Ilçisi Mekan Işangulyýew, Azerbaýjan tarapyndan Azerbaýjan Respublikasynyň Türkmenistandaky Adatdan daşary we Doly ygtyýarly Ilçisi Gasan Zeýlanow, Azerbaýjanyň ADA uniwersitetiniň prorektory Faris Ismailzade çykyş edip, iki ýurduň döwlet baştutanlarynyň saparlary, döwletleriň syýasy-diplomatik, medeni-ynsanperwer we söwda-ykdysady ugurlardaky gatnaşyklarynyň günsaýyn ösdürilýändigini, aýratyn hem geçen ýylyň 21-nji ýanwarynda Aşgabatda Türkmenistanyň we Azerbaýjanyň Daşary işler ministrleri tarapyndan Hazar deňzindäki “Dostluk” uglewodorod ýatagy boýunça Ähtnamanyň baglaşylmagynyň oňyn ähmiýeti barada belläp geçdiler.
Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa öz çykyşynda iki ýurduň arasynda diplomatik gatnaşyklaryň taryhy kökleri, soňky 30 ýylyň içinde özara hyzmatdaşlygyň dürli ugurlarda ösdürilendigi barada nygtap geçdi. Institutda hereket edýän Strategik barlaglar boýunça ylmy merkeziň başlygy Şiri Şiriýewiň Türkmenistanyň we Azerbaýjanyň degişli ýokary okuw mekdepleri bilen Özara düşünişmek hakynda Ähtnamanyň baglaşylandygyny we häzirki günde taraplaryň özara gatnaşyklary berkitmekde hem-de ösdürmekde tagallalary gaýgyrmaýanlygyny aýratyn nygtady. Şeýle-de iki ýurduň döwlet edaralarynyň wekilleriniň dürli ugurlardaky çykyşlary özüniň aýratynlygy bilen tapawutlandy.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.