TÜRKMEN ÝAŞLARY “DAŞARY ÝURTLY TALYPLAR WE HÜNÄRMENLER ÜÇIN GERMANIÝADA TOMUSKY ÝOKARY OKUW KURSLARY” ATLY OKUW MAKSATNAMASYNA GATNAŞDYLAR
2024-nji ýylyň 2-28-nji awgusty aralygynda ýurdumyzyň ýokary okuw mekdepleriniň talyp ýaşlary “Germaniýanyň akademiki alyş-çalyş gullugynyň” (DAAD) maksatnamasynyň çäklerinde Germaniýa Federatiw Respublikasynyň Berlin şäherinde ýerleşýän Halkara aragatnaşyklary institutynda geçirilen “Daşary ýurtly talyplar we hünärmenler üçin Germaniýada tomusky ýokary okuw kurslary” atly okuw maksatnamasyna gatnaşdylar. Okuw maksatnamasyna beýleki ýaşlar bilen bir hatarda Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň 4-nji ýyl talyby Ysmaýyl Berdiýew hem gatnaşdy.
Dört hepde dowam eden akademiki başlangyç gatnaşyjylaryň nemes dili ukyplaryny ýokarlandyrmak, medeni-aňyýeti we şahsyýet başarnyklaryny ösdürmek üçin döredildi. DAAD maksatnamasy interaktiw synpy çäreleri, diskussiýalary, umumy sapaklary, onlaýn okuwlary öz içine alýan giňişleýin okuw meýilnamasyny hödürledi. Meýilnama laýyklykda, gatnaşyjylar birnäçe medeni çärelere, nemes medeniýeti we taryhy boýunça geçirilýän sapaklara gatnaşdylar. Bu maksatnama dünýäniň dürli künjeginden gelen pikirdeş talyplar bilen aragatnaşyk saklamak we aragatnaşyk gurmak üçin platforma bolup hyzmat etdi.
Şeýle-de maksatnamanyň çäklerinde geçirilen çäräniň dowamynda Türkmenistanyň Daşary işler ministrliginiň Halkara gatnaşyklary institutynyň talyby Muzeý adasyna saparda boldy. Bu sapar Germaniýanyň taryhy we medeni gymmatlyklary barada ýolbeletli gezelenji öz içine aldy.
Türkmen ýaşlaryna okamaga, işlemäge, daşary ýurt tejribelerini öwrenmäge uly mümkinçilikleri döredip berýän türkmen halkynyň Milli Lideri, Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, tutýan tutumly işleri elmydama rowaçlyklara beslensin!
Ysmaýyl BERDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň IV ýyl talyby.