Türkmen-türk gatnaşyklaryna bagyşlanan duşuşyk
2022-nji ýylyň 26-njy dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Stambul şäherindäki Baş konsul Myratgeldi Seýitmämmedow bilen türkmen-türk gatnaşyklaryna bagyşlanan duşuşyk geçirildi.
Myratgeldi Seýitmämmedow 2022-nji ýylyň 14-nji dekabrynda “Awaza”milli syýahatçylyk zolagynyň Kongresler merkezinde geçirilen Türkmenistanyň, Azerbaýjan Respublikasynyň, Türkiýe Respublikasynyň birinji üçtaraplaýyn sammitini aýratyn belledi. Ýokary derejedäki üçtaraplaýyn duşuşyk Bitarap Türkmenistanyň taraplaryň özara bähbitlerine, ählumumy abadançylygyň maksatlaryna laýyk gelýän netijeli hyzmatdaşlygy mundan beýläk-de ösdürmek meselelerine öňdengörüjilikli we başlangyçly çemeleşýändigini ýene-de bir gezek görkezdi. Sammitde ýurdumyzyň öňe süren netijeli teklipleri munuň aýdyň subutnamasy bolup, bu teklipler hyzmatdaşlygyň köpugurly kuwwatyny has doly derejede durmuşa geçirmäge, taryhyň dowamynda kemala gelen dostluk we doganlyk däplerine esaslanýan döwletara gatnaşyklary häzirki döwrüň ýagdaýlaryna laýyk gelýän hil taýdan täze sepgitlere çykarmaga gönükdirilendigini nygtady.
Hormatly Ilçi iki ýurduň söwda-ykdysady senagaty, oba-hojalyk ulgamy, olarda gazanylýan üstünlikler dogrusynda gürrüň berdi. Bulardan başga-da geljekde doganlyk iki ýurduň arasyndaky dost-doganlyk gatnaşygynyň has hem pugtalanýandygyny, hyzmatdaşlygyň mundan beýläk hem gülläp ösjekdigini belledi.
Duşuşygyň ahyrynda talyplar Myratgeldi Seýitmämmedowa özlerini gyzyklandyrýan sowallary bilen ýüzlendiler. Bu duşuşyk oňa gatnaşanlarda uly täsir galdyryp, talyplarda öz saýlan hünärlerine bolan söýgüsini has hem artdyrdy.
Maýa GURDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.