Türkmen talyplarynyň halkara matematika olimpiadasyndaky üstünlikleri
2021-nji ýylyň 18-nji aprelinde Sankt-Peterburgyň informatika tehnologiýalary, mehanika we optika barlaglary milli uniwersitetiniň guramagynda geçirilen Demirgazyk ýurtlaryň uniwersitetleriniň VII Matematika olimpiadasyna (NCUMC-2021) ýurdumyzyň ýokary okuw mekdepleriniň talyplary gatnaşyp, uly üstünlikleri gazandylar. Olimpiada dürli ýurtlaryň ýokary okuw mekdepleriniň 40-syndan jemi 350-den gowrak talyp gatnaşdy. Şol sanda, ýurdumyzdan Magtymguly adyndaky Türkmen döwlet uniwersitetiniň, Seýitnazar Seýdi adyndaky Türkmen döwlet mugallymçylyk institutynyň, Türkmenistanyň Oguz han adyndaky Inžener-tehnologiýalar uniwersitetiniň, Türkmen döwlet binagärlik-gurluşyk institutynyň, Halkara ynsanperwer ylymlary we ösüş uniwersitetiniň, Türkmen oba hojalyk institutynyň, Türkmen döwlet energetika institutynyň, S.A.Nyýazow adyndaky oba hojalyk uniwersitetiniň, Türkmenistanyň telekomunikasiýalar we informatika institutynyň, Türkmenistanyň Inžener-tehniki we ulag komunikasiýalar institutynyň wekilleri gatnaşyp, olaryň 7-si birinji we 26-sy baýrakly orunlary eýelediler.
Ýokary guramaçylyk derejesinde geçirilen bu halkara bäsleşigine institutymyzyň Halkara ykdysady gatnaşyklary fakultetiniň 1-nji ýyl talyby Arazgül Ballyýewa, 3-nji ýyl talyby Akmyrat Tirkeşow, şeýle hem şol fakultetiň 4-nji ýyl talyby Tawus Ballyýewa gatnaşyp üstünlikli çykyş etdiler. Matematika boýunça geçirilen halkara olimpiadasynda talyp deň-duşumyz Akmyrat Tirkeşowyň ýokary netije görkezip, birinji orna we Arazgül Ballyýewanyň höweslendiriji orna mynasyp bolmagy örän guwandyryjydyr.
Arazgül BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň 1-nji ýyl talyby