«Türkmen-Saud gatnaşyklary» atly «tegelek stol» maslahaty geçirildi
Arkadagly Serdarymyzyň parasatly baştutanlygynda Türkmenistan halkara giňişlikde ählumumy abadançylygyň hatyrasyna parahatçylyk söýüjilikli daşary syýasaty alyp barmak bilen bir hatarda, dünýä döwletleriniň ençemesi bilen hoşniýetli hyzmatdaşlygy barha ösdürýär. Şeýle döwletleriň biri-de musulman dünýäsinde iki mukaddesligiň mesgeni hasaplanylýan Saud Arabystany Patyşalygydyr.
Türkmenistan bilen Saud Arabystany Patyşalygynyň arasyndaky asyrlaryň dowamynda kemala gelen dostlukly gatnaşyklar, ruhy we medeni ýörelgeleriň umumylygy iki ýurduň ösüşiniň häzirki tapgyrynda doganlyk halklaryň mundan beýläk-de ýakynlaşmagyna, dostlukly gatnaşyklaryň we örän oňaýly mümkinçiliklere eýe bolan köp sanly ugurlaryň has-da öňe ilerlemegine hyzmat edýär. Hormatly Prezidentimiz Serdar Berdimuhamedowyň Türkmenistanyň Prezidenti wezipesine saýlanyp, daşary ýurda ilkinji saparynyň yslam dünýäsinde keramatly saýylýan mukaddes ýere — Saud Arabystany Patyşalygyna amala aşyrandygy hem türkmen-saud gatnaşyklarynyň ýokary derejesini aýdyňlygy bilen görkezýär. Häzirki wagtda ikitaraplaýyn we köptaraplaýyn esasda, ilkinji nobatda bolsa, iri halkara guramalaryň hem-de sebit düzümleriniň çäklerinde yzygiderli kämilleşdirilýän netijeli gatnaşyklar täze many-mazmuna eýe bolýar.
Mälim bolşy ýaly, 2016-njy ýylyň 1 — 3-nji maýy aralygynda Gahryman Arkadagymyzyň Saud Arabystany Patyşalygyna resmi sapary boldy. Saparyň dowamynda Gahryman Arkadagymyz dünýäniň ähli musulmanlary üçin mukaddes bolan şäherlere — Mekgä we Medinä zyýarat etdi. Bu saparyň dowamynda Türkmenistanyň Daşary işler ministrliginiň Halkara gatnaşyklary instituty bilen Saud Arabystany Patyşalygynyň Daşary işler ministrliginiň Emir Saud Al Faýsal adyndaky Diplomatiýany öwreniş institutynyň arasynda Hyzmatdaşlyk Maksatnamasyna gol çekilendigi aýratyn guwandyryjydyr.
Bu hyzmatdaşlygyň çäginde ýokary okuw mekdepleri bilelikde türkmen-saud gatnaşyklaryna bagyşlap yzygider «tegelek stol» maslahatlaryny geçirýärler. 2022-nji ýylyň 19-njy dekabrynda hem Türkmenistanyň Daşary işler ministrliginiň Halkara gatnaşyklary instituty bilen Saud Arabystany Patyşalygynyň Daşary işler ministrliginiň Emir Saud Al Faýsal adyndaky Diplomatiýany öwreniş institutynyň arasynda tegelek stol maslahaty geçirildi. Oňa bu ýokary okuw mekdebiniň, Saud Arabystany Patyşalygynyň Daşary işler ministrliginiň Emir Saud Al-Faýsal adyndaky Diplomatiýany öwreniş institutynyň wekilleri gatnaşdylar. Maslahatyň öň ýanynda daşary ýurtly myhmanlar Türkmenistanyň Daşary işler ministrliginiň Halkara gatnaşyklary institutynyň okuw binalaryna aýlanyp gördüler hem-de institutda ýokary bilim alýan ýaşlar üçin döredilen giň mümkinçilikler, ýokary okuw mekdebinde hereket edýän okuw studiýasy, elektron gazetiň redaksiýasy we «Parahatçylygyň ýaş çaparlary» atly akyl-paýhas bäsleşigi üçin ýörite taýýarlanylan «Türkmeniň ak öýi» bilen ýakyndan tanyş boldular.
Maslahatyň dowamynda çykyş edenler ikitaraplaýyn gatnaşyklaryň syýasy, söwda-ykdysady, medeni-ynsanperwer ugurlarynyň şu günki ýagdaýy, şeýle-de olary ösdürmegiň bar bolan mümkinçilikleri dogrusynda aýratyn nygtap geçdiler. Çykyşlarda Türkmenistanyň we Saud Arabystany Patyşalygynyň halkara parahatçylygyny we durnuklylygyny saklamakda eýeleýän orny barada hem aýdyldy.
Maslahatdan soňra Saud Arabystany Patyşalygynyň Daşary işler ministri Faýsal bin Farhan Al Saud Türkmenistanyň Daşary işler ministrliginiň Halkara gatnaşyklary institutynyň talyplarynyň öňünde leksiýa bilen çykyş etdi.
Soňra saud wekiliýeti Saud Arabystany Patyşalygynyň Türkmenistandaky Ilçihanasynyň täze binalar toplumynyň resmi açylyş dabarasyna gatnaşdy.
Ertir — 20-nji dekabrda Saud Arabystany Patyşalygynyň Daşary işler ministrliginiň Emir Saud Al Faýsal adyndaky Diplomatiýany öwreniş institutynyň wekiliýetiniň Aşgabat şäherindäki muzeýlere, söwda we medeni-dynç alyş merkezlerine gezelençleri guralar.
Gurbansähet GURBANSÄHEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.
Şeýle hem bu barada şu ýerden okap bilersiňiz: