Türkmen-eýran ýöriteleşdirilen moda we lybas sergisi
2024-nji ýylyň 27-29-njy awgustynda Türkmenistanyň Döwlet çeperçilik akademiýasynyň sergiler zalynda «Türkmen-Eýran ýöriteleşdirilen moda we lybas sergisi hem-de hünär ussatlyk sapaklary» geçirilýär. Bu sergi Eýran Yslam Respublikasynyň Türkmenistandaky ilçihanasynyň Medeniýet merkezi we Türkmenistanyň Dokma senagaty ministrligi bilen bilelikde guramagynda geçirilýär. Sergide iki ýurduň dokma kärhanalarynyň hem-de meşhur brendleriniň ýokary hilli önümleri görkezilýär. Bu ýerde eýranly sungat ussadynyň gatnaşmagynda geçirilýän hünär ussatlyk sapagy, täze tejribeleri toplamakda möhüm ähmiýete eýedir.
Bu halkara sergä ýurdumyzyň degişli edaralarynyň wekilleri bilen birlikde, Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň talyplary hem işjeň gatnaşdylar. Munuň özi Türkmenistanyň we Eýranyň moda hem-de dokma pudaklaryndaky soňky gazananlary bilen tanyşmaga aýratyn mümkinçilik boldy.
Merjen ORAZDURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.