24/11/2023
920
Täsirli geçen okuw sapary
2023-nji ýylyň 20-23-nji noýabry aralygynda Türkmenistanyň Daşary işler ministrliginiň Halkara gatnaşyklary institutynyň mugallymlaryndan we talyplaryndan düzülen ýörite topar Birleşen Arap Emirlikleriniň Anwar Gargaş adyndaky Diplomatik akademiýasynda okuw saparynda boldular.
Bilşimiz ýaly, Türkmenistan bilen BAE-niň arasyndaky syýasy-diplomatik, söwda-ykdysady, medeniýet, ylym-bilim boýunça işjeň hyzmatdaşlyk döwletara gatnaşyklaryň ileri tutulýan ugurlarynyň hatarynda durýar. Şeýle-de, iki ýurduň bilim ulgamyndaky gatnaşyklary günsaýyn täze derejelere çykýar.
Okuw saparyň ilkinji gününde talyplar diplomatik akademiýada alnyp barylýan işler bilen tanyşdylar. BAE-niň Halyfa ylym we tehnologiýa uniwersitetiniň professory Diana Frensis dünýädäki global meseleleriň biri bolan howanyň üýtgemegi, onuň häzirki wagtdaky ýagdaýy we şu ýylyň 12-nji dekabrynda Dubaýda geçiriljek "COP-28" maslahatynda garaljak meseleler dogrusynda geçiren okuw sapagynda talyplar özara toparlara bölünip howanyň hapalanmagynyň geljekde adamzada ýetirjek täsirleri dogrusynda sorag-jogap alyşdylar.
21-nji noýabrda okuw saparynyň ikinji güni BAE-niň hünärmeni Halkan Alsuwaýid talyplara halkara hyzmatdaşlygy we daşary syýasat, ýurtlaryň arasyndaky diplomatik gatnaşyklary pugtalandyrmakdaky taryhy tejribe, diplomatiýanyň şu günki orny, BAE-niň syýasy gurluşy barada okuw sapagyny geçdi. Şeýle-de, doktor Damýana Bakardziýewa "BAE-niň ykdysadyýeti", Hessa Muroşid "BAE-niň medeniýeti däp-dessury hem-de taryhy" barada çykyş etdi. Täsirli geçen okuw saparynyň çäginde "Sheikh Zayed Grand" metjidine, "Louvre Abu Dhabi" muzeýine, "Qasr Al Watan" Prezident köşgüne , "Qasr Al Hosn" gadymy ýadygärligi bolan daş binasyna gezelenç gurnaldy.
Döwlet JUMAGYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň IV ýyl talyby.
Bu barada şu ýerde hem okap bilersiňiz: