Tomusky dil öwreniş okuwlary
2022-nji ýylyň 6 — 27-nji awgusty aralygynda Germaniýanyň Akademiki alyş-çalyş gullugy DAAD — HSK 2022 (Deutscher Akademischer Austausch Dienst – Hochschulsommerkurse 2022) tarapyndan Drezden şäherinde guralan tomusky dil öwreniş okuwlaryna gatnaşmak üçin okuw saparynda boldum.
Okuw saparynyň maksady nemes dilini çuňňur öwrenmekden, sözleýişi kämil derejelere çenli ösdürmekden we şol bir wagtyň özünde, Germaniýa Federatiw Respublikasynyň asyrlarboýy toplanan medeniýeti, taryhy, sungaty, döwletiň tebigaty, haýwanat dünýäsi bilen giňişleýin tanyşmakdan ybaratdyr. DAAD — HSK programmasyna her ýyl dünýäniň dürli döwletlerinden talyplar gatnaşyp, öz dil bilimlerini kämilleşdirýärler.
Biz okuw saparynyň dowamynda nemes dilinde dürli söhbetdeşlikleri amala aşyrdyk, Drezden şäheriniň gözel ýerlerine aýlandyk, nemes aşhanasynyň tagamlaryny dadyp gördük, başga döwletlerden gelen talyplar bilen tanyşdyk hem-de dostlaşdyk. Okuw sapary örän gyzykly geçdi.
Biziň okamagymyza, dünýä dillerini çuňňur öwrenmegimize giň mümkinçilikleri döredip berýän Arkadagly Serdarymyza köp sagbolsun aýdýaryn.
Arslankerim KERIMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
IV ýyl talyby.