Talyplarymyz daşary ýurtda tejribelik okuw sapagyny geçdiler
2024-nji ýylyň 4-nji sentýabrynda Türkmenistanyň Daşary işler ministrliginiň
Halkara gatnaşyklary institutynda daşary ýurtda okuw saparynda bolan talyplar bilen
institutyň talyplarynyň gatnaşmaklarynda saparyň jemlerine bagyşlanan maslahat
geçirildi. 2024-nji ýylyň tomusky dynç alyş möwsüminde 6 hepdelik okuw saparynda
bolan Halkara gatnaşyklary fakultetiniň 4-nji ýyl talyby Ysmaýyl Berdiýew “German
akademiki alyş-çalyş hyzmaty” (DAAD) maksatnamasynyň esasynda Germaniýa
Federatiw Respublikasyndaky Halkara gatnaşyklary institutynda “Germaniýada
daşary ýurtly talyplar we hünarmenler üçin uniwersitet tomusky kurslaryna”, şeýle
hem, Halkara ykdysady gatnaşyklary fakultetiniň 4-nji ýyl talyby Ýupar Egirjäýewa
“Amerikanyň birleşen ştatlarynyň ýokary okuw jaýlary” (SUSI) maksatnamasynyň
esasynda ABŞ-niň Waşington ştatyndaky Obernde ýerleşýän Grin Riwer kollejinde
geçirilen “Ýaşlar üçin ekologiki meseleler” atly maksatnamasyna gatnaşdy.
Maslahatyň dowamynda bu barada slaýdlaryň üsti bilen gyzykly gürrüň
berdiler. Şeýle-de okuw saparynda talyplar özlerinde galan täsiri we dünýäni görmek
üçin berlen mümkinçiligiň ähmiýeti barada belläp geçdiler we maslahata gatnaşýan
mugallymlardyr talyp ýaşlar bilen özara tejribe alyşdylar.Bu mümkinçilikden
peýdalanan talyplaryň bilimlerini has hem kämilleşdirjeklerine we toplan tejribelerini
geljekde halkara gatnaşyklarynyň çäginde iş ýüzünde ulanjakdyklaryna ynanýarys.
Maslahatyň ahyrynda talyplar Gahryman Arkadagymyza we Arkadagly
Gahryman Serdarymyza ýaşlaryň bilimlerini ösdürmek ugrunda döredip berýän
mümkinçilikleri üçin ýürek buýsançlaryny beýan etdiler we alkyş sözlerini aýtdylar.
Ayjahan HOJAGELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.