«TURKMENTEXTILE EXPO— 2025» ATLY HALKARA SERGI- ÝARMARKA ÖZ IŞINE BAŞLADY
Hormatly Prezidentimiziň tagallasy bilen ýurtda yzygiderli geçirilýän halkara
sergileriniň, maslahatlarynyň, festiwallaryň täsiri uludyr. Muňa mysal edip, şu
ýylyň 2025-nji ýylyň 11—13-nji iýuny aralygynda Aşgabatda geçirilýän
«Turkmentextile Expo — 2025» atly halkara sergi-ýarmarkasy ýurdumyzyň
ykdysady durmuşynda uly ähmiýetli waka bolar. Türkmenistanyň Dokma senagaty
ministrligi we Söwda-senagat edarasy tarapyndan guralan
sergi ýurdumyzda hereket edýän pagta egriji we dokma fabrikleriň, dokma
toplumlaryň, ýüpekçilik kärhanalaryň, tikinçilik we aýakgap fabrikleriň hem-de
göni gaýtadan işleýän zawodlaryň onümçilik mümkinçilikleri bilen tanyşdyrdy.
Täze tilsimat enjamlaryň ornaşdyrylmagy bilen bilelikde, pudakda öndürilýän
önümleriň hiline has uly üns berilýär. Şu gezekki sergä dokma enjamlaryny,
boýaglary öndürmek babatda öňdebaryjy kompaniýalaryň birnäçesiniň
gatnaşmagy hem munuň aýdyň mysalydyr. Ýaponiýanyň “Toyota Industries
Corporation”, “Murata Machinery”, Şweýsariýanyň “Rieter”, Hindistanyň
“LMW Global FZE”, “Lakshmi Card Clothing” kompaniýalary dokma
kärhanalary üçin enjamlary öndürmekde, olary döwrebaplaşdyrmakda
hyzmatdaşlyk mümkinçilikleri bilen tanyşdyrýarlar. Türkiýäniň “MRN
Kimya”, Hindistanyň “Indokem”, “Atul chemical”, Tailandyň “Ben tech
Chemical” kompaniýalary bolsa dokma senagaty üçin boýaglaryň giň
görnüşlerini hödürleýärler.
Serginiň çäklerinde milli we daşary ýurtly dizaýnerleriň, modalar
öýleriniň taýýarlaýan lybaslary bilen tanyşmak üçin guralan moda
görkezilişinde Italiýanyň, Fransiýanyň, Beýik Britaniýanyň, Niderlandlaryň,
Singapuryň, Hindistanyň, Gazagystanyň we Özbegistanyň dünýä belli
dizaýnerleriniň taýýarlaýan lybaslar toplumlarynyň işleri tanyşdyryldy.
Aşgabat modalar öýüniň, “Goç Ýigit”, “Duman Show”, “Dana Peri”,
“AINA”, “Aýna Sari”, “Mirasly Senet”, “Binayim” “Chynar Fashion”, “LN”
ýaly modalar öýleriniň we dizaýnerleriň nepis türkmen keşdeleri bilen
bezelen türkmen milli lybaslarynyň tanyşdyrylmagy bu ugurda daşary ýurtly
kärdeşleri bilen hem ýakyndan hyzmatdaşlyk edip, milli tikinçilik däplerini
has-da ösdürilmegine uly mümkinçilik döredýär.
Ýokary derejede guralan «Turkmentextile Expo — 2025» atly halkara
sergi-ýarmarka ýurdumyzyň dokma senagatynda gazanylan ösüşlerini üpjün
etmekde we ösdürmekde daşary ýurt kompaniýalary hem-de halkara maliýe
guramalary bilen hyzmatdaşlygyň ýola goýulmagynyň işjeňleşmeginde nobatdaky
ädim bolar.
Mährijemal MÄMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň uly mugallymy.