TEST BÄSLEŞIGI GEÇIRILDI
2025-nji ýylyň 10-njy noýabrynda Türkmenistanyň Daşary işler ministrliginiň Halkara gatnaşyklary institutynda Žurnalistikanyň nazaryýeti we amalyýeti kafedrasy tarapyndan Halkara žurnalistikasy fakultetiniň talyplarynyň arasynda türkmen halkynyň Milli Lideri Gahryman Arkadagymyzyň «Hakyda göwheri» atly kitaby boýunça test bäsleşigi geçirildi.
Test sowallary halkymyzyň taryhy maglumatlara daýanýan ruhy-medeni hazynasynyň dür-merjeni hasaplanýan Gahryman Arkadagymyzyň «Hakyda göwheri» atly kitabyndan taýýarlanylyp, onda akyldar şahyrymyz Magtymguly Pyragynyň terbiýeçilige ýugrulan goşgy setirlerinden bölekler getirildi. Şol sanda Gahryman Arkadagymyzyň türkmen edebiýatynyň görnükli wekilleri, milli mirasymyzyň gymmatlyklary barada aýdan parasatly jümleleri hem test sowallarynyň içinde ýerleşdirildi.
Talyplaryň arasynda şular ýaly bäsleşikleriň geçirilmegi olaryň milli medeniýetimiz, geçmiş mirasymyz bilen bagly düşünjeleriniň has-da artmagyna ýardam berýär. Bäsleşigiň jemleri boýunça ýokary netije görkezen talyplar belli edilip, olara guramaçylyk topary tarapyndan hormat hatlary gowşuryldy.
Gülnara MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.