«Temmäkiniň we düzüminde nikotin bolan önümleriň zyýany barada» atly tema boýunça sanly ulgam arkaly açyk sapagy geçirildi
2025-nji ýylyň 1-nji oktýabrynda Myrat Garryýew adyndaky Türkmenistanyň Döwlet lukmançylyk uniwersitetiniň guramagynda «Temmäkiniň we düzüminde nikotin bolan önümleriň zyýany barada» atly tema boýunça açyk sapagy geçirildi. Sanly ulgam arkaly geçirilen açyk sapagyna institutymyzyň pedagogik işgärleri, talyp ýaşlary gatnaşdylar. Açyk sapagynda temmäkiniň we düzüminde nikotin bolan maddalaryň häzirki wagtda bütin dünýäde ynsan saglygyna we jemgyýete ýaramaz täsir edýändigi bellenilip geçildi. Temmäkiniň tüssesindäki iň işjeň madda hasaplanýan nikotiniň gana aralaşandan soň, arterial gan basyşynyň yzygiderli ýokarlanmagyna getirip, adam bedeninde kislorod ýetmezçiligine we başga-da birnäçe keselleriň döremegine itergi berýär. Şeýle hem adam bedeninde temmäkiniň zäherleýji maddalarynyň täsiri, onuň bilen aragatnaşykda bolýan adamlaryň, maşgala agzalarynyň saglygyna ýetirýän zyýany, temmäkiniň tüssesi bolan otagda uzak wagtlap bolunmagy, şol howadan dem alynmagy bilen ýüze çykýan keseller hakynda nygtaldy.
Häzirki wagtda Gahryman Arkadagymyzyň, Arkadagly Gahryman Serdarymyzyň baştutanlygynda ähli halkymyzyň, esasan-da ýaş nesliň sagdyn, ruhubelent bolup ýetişmekleri ugrunda birnäçe işleriň amala aşyrylýandygy, bu babatda talyp ýaşlaryň hem öz mynasyp goşandyny goşmalydygy, temmäkiniň we nikotin maddalaryň zyýanly netijeleriniň ýüze çykmagynyň garşysyna berk göreşmelidigi barada aýdyldy.
Begmuhammet ORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III talyby.