Telekeçiler ýurdumyzyň altyn gaznasydyr
2021-nji ýylyň 17-18-nji martynda paýtagtymyz Aşgabatda Türkmenistanyň Senagatçylar we telekeçiler birleşmesiniň döredilmeginiň 13 ýyllygy mynasybetli serginiň we birleşmäniň agzalarynyň maslahatynyň açylyş dabarysy boldy. Hormatly Prezidentimiziň ‹‹Hususy telekeçilik häzirki döwürde ýurdumyzyň ykdysadyýetiniň we jemgyýetiniň durmuşynyň aýrylmaz bir bölegi›› diýen parasatly sözlerinden ugur alyp, her ýylda bu birleşmäniň döredilen güni mynasybetli guralýan ýurdumyzyň senagatçylarynyň we telekeçileriniň sergisi hem-de birleşmäniň agzalarynyň maslahaty bagtyýarlyk döwrümizde hususy pudakda gazanylanlary giňişleýin açyp görkezýär. ‹‹Türkmenistan – parahatçylygyň we ynanyşmagyň Watany›› ýylynda bu serginiň we maslahatyň geçirilmegi aýratyn many-mazmuna eýe bolup, ata Watanymyzyň Garaşsyzlygynyň 30 ýyllygy we Aşgabadyň 140 ýyllygy bilen utgaşýar.
Söwda-senagat edarasynyň sergi jaýynda bu sergä gatnaşyjy ‹‹Täç hil›› hususy kärhanasynyň 10 ýyldan gowrak iş tejribesi bolup, ilkinji önümi polietilen torbalary 2009-njy ýylda öndürip başlady. Häzirki wagtda kärhana polietilen torbalary müşderileriň isleglerine görä islendik görnüşinde öndürmek bilen çäklenmän, eýsem 45-den gowrak önümleri öndürýär. Kärhananyň öndürýän önümleriniň ählisi-de halkara talaplaryna laýyklykda sertifikatlaşdyrylan we alyjylaryň arasynda uly islegden peýdalanýar. Olaryň arasynda arassaçylyk we çagalara niýetlenen kosmetiki çygly süpürgiçler, şeýle hem ‹‹Täç hil›› nyşanly şampunlar, duş üçin suwuklyklar we zyýansyzlandyryjy serişdeler bar. Kärhananyň satuwa çykaran iň soňky önümleriniň biri hem ýakymly ysly atyrlardyr. Şu günki günde kärhana erkek adamlar, şeýle-de zenan maşgalalar üçin niýetlenen 10 sany atyry birnäçe ylmy barlaglaryň netijesinden soň satuwa çykardy. ‹‹Täç hil›› hususy kärhanasy diňe içki bazarlarymyzy üpjün etmek bilen çäklenmän, eýsem goňşy döwletlerimize hem eksport edýär.
Şeker HUDAÝBERENOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby