Tejribe — kämilligiň gözbaşy
Žurnalistika diňe bir teoriýa, kitap ýüzündäki düzgünler däl, eýsem, göni durmuşyň, wakalaryň we jemgyýetiň jümmüşinde kemala gelýän sungatdyr. Okuwda alan çuňňur bilimlerimizi iş ýüzünde berkitmekde göýäki bir berk binýat bolup durýan önümçilik tejribeliginiň orny örän uludyr.
Biz — geljekki žurnalistler hökmünde bu möhüm tapgyry ýurdumyzyň gazet-žurnallarynyň redaksiýalarynda işjeň geçýäris. Redaksiýalarda habaryň döreýiş usulyýetini, analitik makalalaryň taýýarlanyşyny, redaktorlyk we korrektorlyk işiniň inçe syrlaryny öwrenmek diýseň gyzykly we jogapkärli. Halypa žurnalistleriň maslahatlary hem-de olaryň hünär tejribesi biziň galamymyzyň has-da ýitileşmegine, pikirimiziň aýdyň we täsirli bolmagyna ýardam edýär.
Institutymyzyň döwrebap okuw studiýasynda geçýän amaly sapaklarymyz hem-de tejribeligimiz teleýaýlymyň we radio žurnalistikasynyň syrlaryna aralaşmaga giň mümkinçilik berýär. Kameranyň öňünde özüňi alyp barmak, mikrofon bilen işlemek, gepleşikleri alyp barmak, ses we montaž işlerini özbaşdak ýerine ýetirmek biziň tejribämizi has-da baýlaşdyrýar. Tejribelikde her bir amaly synanyşyk, döredijilikli gözleg bizi täze üstünliklere ruhlandyrýar.
Amalyýetde taplanan bilim ýitirilmeýän hazynadyr. Gazet-žurnallaryň redaksiýalaryndaky we okuw studiýasyndaky toplan tejribämiz bize öz geljekki hünär ýolumyzy tapmaga we hünär taýdan kämillige ýetmäge ugrukdyrýar. Hünär bilimimizi kämilleşdirmek üçin bize şeýle ajaýyp mümkinçilikleri döredip berýän Gahryman Arkadagymyza hem-de Arkadagly Gahryman Serdarmyza köp sagbolsun aýdýarys. Gahryman Arkadagymyzyň, Arkadagly Gahryman Serdarmyzyň janlary sag, belent başlary aman, tutýan tutumly işleri rowana ýollarda rowaçlyklara beslensin!
Aýsona AMANJAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 4-nji ýyl talyby