551
Tegelek stol ýazgysy
2021-nji ýylyň 15-nji martynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Sport we ýaşlar syýasaty ministrliginiň, Türkmenistanyň Daşary işler ministrliginiň Halkara gatnaşyklary institutynyň hem-de “Türkmenistan Sport” teleýaýlymynyň bilelikde gurnamaklarynda “Bitaraplyk. Parahatçylyk. Sport” atly “tegelek stol” ýazgysy geçirildi. Bu ýazga Türkmen döwlet bedenterbiýe we sport institutynyň talyby, sportuň agyr atletika görnüşi boýunça dünýä çempiony Ýulduz Jumabaýewa, Türkmenistanyň Sport we ýaşlar syýasaty ministrliginiň Türkmenistanyň Ýokary sport ussatlygy mekdebiniň agyr atletika bölüminiň tälimçi-mugallymy Meretguly Sähetmyradow, Türkmenistanyň Sport we ýaşlar syýasaty ministrliginiň halkara gatnaşyklary bölüminiň baş hünärmeni Ýalkapberdi Aşyrmyradow, Türkmenistanyň Daşary işler ministrliginiň Halkara gatnaşyklary institutynyň mugallymlary Merjen Gurbannazarowa, Akmuhammet Jumagulyýew we talyp ýaşlar gatnaşdylar.
"Tegelek stol” ýazgysynyň dowamynda häzirki döwürde türkmen türgenleriniň abraýly halkara ýaryşlara yzygiderli gatnaşýandyklary, öz ussatlyklaryny görkezýändikleri we baýrakly orunlary eýeläp, dürli derejeli medallara mynasyp bolýandyklary barada, şeýle hem hormatly Prezidentimiziň Garaşsyz, Bitarap Watanymyzy sport ýurduna öwürmek ugrunda edýän ýadawsyz tagallasy we oňyn başlangyçlary barada aýdyldy. Ýazgynyň ahyrynda oňa gatnaşyjylar sport äleminde döredip berýän giň mümkinçilikleri üçin Gahryman Arkadagymyza alkyş sözlerini aýtdylar.
Aýgül MÄTIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby