TEGELEK STOL DUŞUŞYGY GEÇIRILDI
2025-nji ýylyň 9-njy oktýabrynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň guramagynda institutyň mugallymlarynyň we talyplarynyň gatnaşmagynda Birleşen Milletler Guramasynyň Baş Assambleýasynyň 80-nji plenar mejlisinde Türkmenistan tarapyndan öňe sürlen “Köpdilli diplomatiýanyň halkara gününi” yglan etmek boýunça teklibiň ähmiýeti barada tegelek stol duşuşygy geçirildi.
Onda institutymyzyň Halkara gatnaşyklary fakultetiniň II ýyl talyplary Guwanç Aliýewiň, Aýgözel Amanowanyň we Aýlar Ataýewanyň çykyşlary diňlenildi. Olar Türkmenistanyň hormatly Prezidentiniň Birleşen Milletler Guramasynyň Baş Assambleýasynyň 80-nji plenar mejlisinde öňe süren teklipleri, şol sanda “Halkara parahatçylygy, howpsuzlygy we durnukly ösüş prosesini üpjün etmek hem-de pugtalandyrmak işinde bitaraplyk syýasatynyň orny we ähmiýeti” atly Kararnamanyň taslamasynyň, “Merkezi Aziýa – parahatçylykda ýaşamagyň giňişligi” atly halkara forumy geçirmeginiň, Türkmenistanyň Merkezi Aziýa ýurtlary üçin çölleşmä garşy göreşmek boýunça sebit merkezini döretmek başlangyjynyň ähmiýeti barada gürrüň berdiler.
Şeýle hem, talyp ýaşlar medeniýetleriň arasynda dialogy ösdürmek we Baş Assambleýanyň halkara gatnaşyklarynda köpdilliligi goldamak boýunça Kararnamalaryny iş ýüzünde durmuşa geçirmek üçin “Köpdilli diplomatiýanyň halkara gününi” yglan etmeginiň teklipleri, Halkara araçylyk gününi yglan etmek hakynda Kararnamanyň, “Durnukly ösüşi üpjün etmekde ygtybarly we durnukly energiýa birikmesiniň esasy orny” atly Kararnamanyň taslamasyny hödürlemegi, “Parahatçylyk we ynanyşmak medeniýeti” meseleleri boýunça bütindünýä sammitini geçirmek, Sanly integrasiýa boýunça bütindünýä platformasyny döretmek we 2028-nji ýyly “Halkara hukugyň ýyly” diýip, yglan etmek baradaky başlangyçlary barada türkmen, rus we iňlis dillerinde çykyş edip, giňişleýin gürrüň berdiler.
Tegelek stol duşuşygy täsirli geçip, onda talyplaryň soraglaryna giňişleýin jogap berildi.
Seýitmuhammet GURBANGELDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.