581
Tebigy we takyk ylmy ugurlary boýunça ylmy seminar geçirildi
2021-nji ýylyň 26-njy fewralynda Türkmenistanyň Daşary işler ministrliginiň Halkara gatnaşyklary institutynyň mejlisler jaýynda Halkara ynsanperwer ylymlary we ösüş uniwersiteti bilen bilelikde tebigy we takyk ylmy ugurlary boýunça ylmy seminar geçirildi. Seminara Türkmenistanyň Daşary işler ministrliginiň Halkara gatnaşyklary institutynyň mugallymlary we talyplary hem-de Halkara ynsanperwer ylymlary we ösüş uniwersitetiniň mugallymlary gatnaşdylar. Bu ylmy seminar “Türkmenistanda tebigy we takyk ylmy ugurlara degişli dersleri okatmagy kämilleşdirmegiň Konsepsiýasyny” ýerine ýetirmek üçin Türkmenistanyň Daşary işler ministrliginiň Halkara gatnaşyklary institutynyň 2021-nji ýyl üçin Meýilnamasynyň 1-nji bendine laýyklykda geçirildi. Ylmy seminarda Türkmenistanyň Daşary işler ministrliginiň Halkara gatnaşyklary institutynyň uly mugallymy, filosofiýa ylymlarynyň kandidaty Ogulgurban Ezimowa, Halkara ynsanperwer ylymlary we ösüş uniwersitetiniň mugallymy Pirmyrat Gurbanow, Türkmenistanyň Prezidentiniň ýanyndaky Döwlet gullugy akademiýasynyň Magistratura okuwynyň diňleýjisi Goçmyrat Ataýew, Halkara ynsanperwer ylymlary we ösüş uniwersitetiniň mugallymy Serdar Bäşimow dagylar çykyş etdiler. Seminara gatnaşyjylar öz çykyşlarynda ekologiýa dolandyryşyny kämilleşdirmegiň obýektiw zerurlygy: “Ekologiýa we daşky gurşawy goramak” okuw dersiniň ähmiýeti barada şeýle hem ykdysadyýetde matematikanyň ulanylyşy, sanly dolandyrylyşyň ähmiýeti hem-de emeli aňyň ykdysadyýetiň pudaklaryna ornaşdyrylmagynyň möhümligi dogrusynda belläp geçdiler. Ylmy seminaryň ahyrynda oňa gatnaşyjylar oňyn bitaraplyk, ählumumy parahatçylygy we durnukly ösüşi üpjün etmäge, halkara gatnaşyklar ulgamynda ornumyzy berkitmäge gönükdirilen daşary syýasat strategiýasyny durmuşa geçirmegi hemde ählumumy abadançylygyň, gülläp ösüşiň we rowaçlygyň maksatlaryna kybap gelýän özara bähbitli hyzmatdaşlyk syýasatyny yzygiderli alyp barýan hormatly Prezidentimize döredip berýän ähli mümkinçilikleri üçin alkyş sözlerini aýtdylar.
Dünýägözel ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby