TÄZE ÝYL BAÝRAMYNA BAGYŞLANYP GEÇIRILEN DABARA
2025-nji ýylyň 27-nji dekabrynda Türkmenistanyň Daşary işler ministrliginiň Halkara gatnaşyklary institutynda Ilkinji Kärdeşler Arkalaşygy guramasynyň we Türkmen döwlet gurjak teatrynyň döredijilik toparynyň bilelikde gurnamagynda Täze ýyl baýramyna bagyşlanan baýramçylyk dabarasy geçirildi.
Bu baýramçylyk dabarasyna institutymyzyň mugallymlarynyň we zähmet çekýän ähli işgärleriniň çagalary, şeýle hem institutymyzyň talyp ýaşlary gatnaşdylar. Baýramçylyk dabarasynda Türkmen döwlet gurjak teatrynyň döredijilik topary öz sahna oýunlary bilen çagalary begendirip, baýramçylygyň şowhunyny has-da artdyrdylar. Täze ýyla bagyşlanan bu baýramçylyk dabarasynda çagalar özleriniň goşgudyr aýdymlaryny aýdyp, Aýaz babadan öz sowgatlaryny aldylar.
Institutymyzda geçirilen baýramçylyk dabarasy ýurdumyzda Täze ýyla görülýan ýokary taýýarlygyň subutnamasydyr. Täze ýylyň dabarasy, şatlyk-şowhuny eýýämden ýurdumyzyň çar künjüni, bagtyýar raýatlarymyzyň her birini baýramçylyk ruhubelentligi bilen gurşap aldy. Hemmelere bagt we şatlyk, ýagşy umyt-arzuwlary eçilýän, köp garaşdyran Täze ýyl baýramy ýetip geldi. Şu pursatlarda ýurdumyzyň ýene bir geçen döwrüniň jemleri jemlenilýär hem-de geljek üçin anyk meýilnamalar düzülýär. Tutuş Diýarymyz baýramçylyk keşbine girýär, Watanymyzyň her bir künjeginde ýokary ruhubelentlik ýagdaýy emele gelýär.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.