Täze goşgular ýygyndysy neşir edildi
Mälim bolşy ýaly, şu ýyl ýurdumyzda hem-de bütin dünýäde Gündogaryň nusgawy şahyry we beýik akyldary Magtymguly Pyragynyň doglan gününiň 300 ýyllygy ýokary derejede dabaralandyrylýar. Şunuň bilen baglylykda, hemişelik Bitaraplygymyzyň 29 ýyllygy mynasybetli, Türkmenistanyň Daşary işler ministrliginiň Halkara gatnaşyklary instituty tarapyndan «Pähim-paýhas ummanyna syýahat» atly täze goşgular ýygyndysy neşir edildi.
Täze neşirde türkmen diplomatiýasynyň milli mekdebiniň bagtyýarlykdan ylham alýan halypa mugallymlarynyň hem-de talyp ýaşlarynyň goşgulary jemlenildi. Kitapda awtorlaryň 12-siniň 100-den gowrak goşgusy ýerleşdirilip, täze taryhy döwrümiziň, Gahryman Arkadagymyzyň hem-de Arkadagly Gahryman Serdarymyzyň tagallalary bilen ýurdumyzda amala aşyrylýan beýik işleriň, mukaddes Garaşsyzlygymyzyň hem-de hemişelik Bitaraplygymyzyň, bagtyýar durmuşymyzyň waspy belentden ýetirilýär. Kitabyň girişi Žurnalistikanyň nazaryýeti we amalyýeti kafedrasynyň uly mugallymy, filologiýa ylymlarynyň kandidaty Baba Saryýew tarapyndan ýazyldy.
Goşgular ýygyndysy Türkmenistanyň Daşary işler ministrliginiň Halkara gatnaşyklary institutynyň Magtymguly Pyragynyň doglan gününiň 300 ýyllygyna taýýarlan mynasyp döredijilik sowgadydyr.
Selbi HOJALYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.