Täsirli okuw sapagy
Türkmenistan döwletimiz Birleşen Milletler Guramasynyň kabul eden köpsanly halkara resminamalaryny kabul etdi. Çagalaryň hukuklary we olaryň goragy hakyndaky halkara resminama hökmünde, ýurtlaryň heniz taryhda görülmedik köplügi bilen ratifisirlenen Çagalaryň hukuklary hakyndaky Konwensiýada ynsana degişli ähli hukuklardan çagalaryň hukuklary doly haklydygy ykrar edilýär. Bu halkara hukuk resminamasy 1989-njy ýylyň noýabr aýynyň 20-sine BMG-niň Baş Assambleýasy tarapyndan kabul edildi we 1990-njy ýylda güýje girdi. Türkmenistan 1994-nji ýylda bu Konwensiýa goşuldy.
Çagalar her bir döwletiň ýagty geljeginiň başlangyjy bolup durýandyr. Olaryň ýokary ahlak sypatlaryna eýe bolmaklaryny we ylym-bilimiň iň täze gazananlary bilen aýakdaş gitmeklerini gazanmak bolsa ýurdumyzyň esasy aladasy bolup durýar. Şu mynasybetli hem Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň “Ýaş hukukçylar” ylmy gurnagynyň guramagynda çagalaryň gününe bagyşlanyp hepdelik geçirildi. Hepdäniň çäginde “Ýaş hukukçylar” ylmy gurnagynyň agzalarynyň gatnaşmagynda paýtagtymyzda ýerleşýän 51-nji orta mekdebiniň okuwçylary bilen okuw sapagy guraldy. Sapagyň dowamynda talyplar hem-de mugallymlar “Çagalaryň hukuklary” barada halkara Konwensiýasynyň taryhy, onuň ähmiýeti dogrusynda prezentasiýa we wideo şekilleriniň üsti bilen türkmen, iňlis we rus dillerinde çagalara sapak berdiler hem-de sorag-jogap alyşdylar.
Altyn BABYŞOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.