TÄSIRLI GEZELENÇ
2025-nji ýylyň 26-njy fewralynda Türkmenistanyň Daşary işler
ministrliginiň Halkara gatnaşyklary institutynyň ilkinji Zenanlar guramasynyň
işjeň agzalarynyň gatnaşmaklarynda Türkmen halysynyň milli muzeýine gezelenç
guraldy.
Gezelenjiň dowamynda talyp gyzlara haly nagyşlarynyň taryhy, adam
saglygy üçin halylaryň peýdasy, haly dokamak sungatynyň biziň günlerimize gelip
ýetmeginde zenanlaryň orny, türkmen gyzlarynda sabyr-takatly bolmak ýaly
häsiýetleriň kemala gelmeginde haly dokamak sungatynyň ähmiýeti barada
maglumatlar berildi. Şeýle-de bu ajaýyp muzeý dünýäniň çar künjeginden gelýän
jahankeşdeleriň hem iň bir gelim-gidimli ýerine öwrülendigini, şeýle-de türkmen
halkynyñ milli ruhy siňen nepis halylaryň jemlenen ýeri bolan bu ajaýyp muzeýde
dürli ýyllarda döredilen iki ýüzli halylaryň, nepis sungatyň taryhynda dokalan iň
uly halylaryň saklanýandygy hakynda muzeýiň hünärmenleri belläp geçdiler.
Türkmen durmuşynyň aýrylmaz bölegine öwrülen halylar tutuş adamzadyň
medeni hazynasyna ägirt uly goşant goşan halkymyzyň gadymy sungatynyň ajaýyp
ýadygärligidir. Türkmen milli halyçylyk sungatynyň ÝUNESKO-nyň adamzadyň
maddy däl medeni gymmatlygynyň sanawyna girizilmegi munuň aýdyň
beýanydyr.
Şeýle gezelençleriň yzygiderli guralmagy türkmen diplomatiýasynyň
geljekki wekilleri bolan talyp ýaşlaryň ukyp-başarnyklarynyň açylmagyna ýetirýän
täsiriniň uludygy bellärliklidir.
Bu gezelenç «Aşgabat» teleýaýlymy tarapyndan ýazgy edildi.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy,
institutyň ilkinji zenanlar guramasynyň başlygy.