Täsirli geçirilen meýletinçileriň okuw sapagy
2022-nji ýylyň 23-nji martynda Türkmenistanyň Daşary işler ministrliginiň Halkara gatnaşyklary institutynda “Türkmenistanda ýaşlar baradaky döwlet syýasatynyň 2021–2025-nji ýyllar üçin Döwlet maksatnamasyny” üstünlikli amala aşyrmak maksady bilen sanly ulgam arkaly yzygiderli alnyp barylýan okuw maslahatynyň nobatdaky sany geçirildi. Türkmenistanyň Bilim ministrliginiň, Türkmenistanyň Gyzyl Ýarymaý Milli jemgyýetiniň hem-de Türkmenistanyň Sport we ýaşlar syýasaty ministrliginiň bilelikde guran bu okuw sapagyna milli diplomatiýanyň ýokary okuw mekdebiniň talyplary gatnaşdylar.
Bu okuw maslahatyny Halkara ynsanperwer ylymlary we ösüş uniwersitetiniň wekili alyp bardy. Ol ýurdumyzda dürli ugurlar boýunça tebigy zehinli ýaşlary ýüze çykarmak maksady bilen amal edilýän işleri ýaşlaryň durmuşyndaky ähmiýetiniň ulydygyny barada täsirli çykyş etdi. Meýletinçileri sagdyn hem ynsanperwer ruhda terbiýelemek guramanyň esasy wezipesi bolup durýandygyny, şeýle hem bu ugurda alnyp barylýan wagyz-nesihat çäreleriniň oňyn netije berýändigini öz çykyşlarynda belläp geçdi.
Okuw sapagynyň ahyrynda oňa gatnaşyjylar ýaş meýletinçileri jemgyýetçilik çärelerine işjeň gatnaşmaga çagyrdylar. Okuw sapagynyň barşy talyp ýaşlaryň gyzykly sowal-jogap alyşmalary bilen utgaşdy.
Dünýägözel ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň III ýyl talyby.