TÄSIRLI GEÇEN OKUW SAPAGY
2024-nji ýylyň 14-18-nji maýy aralygynda Gazagystan Respublikasynyň Almata şäherinde Merkezi Aziýa döwletleriniň hukuk ugrunda okaýan talyplary üçin Ýaz mekdebi tarapyndan gurnalan “Adam hukuklary we daşky gurşaw” atly okuw sapagy geçirildi. Ýewropa Geňeşiniň we Ýewropa Bileleşiginiň 4 ýyllyk bilelikdäki maksatnamasynyň çäklerinde gurnalan bu okuw sapagyna Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň 4-nji ýyl talyplary Umyt Annagylyjowa we Amanbagt Ussaýewa hem gatnaşdylar.
Okuw sapagy hukuk hünäri boýunça ussat hünärmenler we mugallymlar tarapyndan alnyp barylyp, daşky gurşawy goramak we adam hukuklary ýaly ugurlara bagyşlandy. Oňa Gazagystan Respublikasyndan, Gyrgyz Respublikasyndan, Özbegistan Respublikasyndan, Täjigistan Respublikasyndan we Türkmenistandan hukuk hünärinde okaýan talyp ýaşlaryň jemi 40-dan gowragy gatnaşdy.
Okuw sapagynyň ilkinji gününi giriş sözi bilen Gazagystan Respublikasynyň adam hukullary boýunça komissiýasynyň wekili Igor Rogow, Gazagystan Respublikasynyň ylym we ýokary bilim boýunça ministri Saýasat Nurbek, onlaýn görnüşde Ýewropa Bileleşiginiň Gazagystan Respublikasynyndaky Ilçisi, Al-Farabi adyndaky milli gazak uniwersitetiniň, Abaý adyndaky gazak milli pedagogik uniwersitetiniň, D.A.Kunaýew adyndaky uniwersitetiniň rektorlary, şeýle-de Ýewropa Bileleşiginiň adam hukuklary boýunça wekilleri açyp berdiler.
Sapagyň dowamynda oňa gatnaşyjy talyplara Ýewropa geňeşiniň maslahatçysy, hukuk meseleleri boýunça halkara derejeli trener Ýewa Massa, Liwerpul Uniwersitetinden sosial adalatlylyk we hukuk mekdebiniň dekanynyň orunbasary, professor Konstantin Degtýarew hem-de Ýewropa geňeşiniň maslahatçysy, Adam hukuklary boýunça baş hukukçy Malgožata Kwendaç-Paloş adam hukuklary boýunça Ýewropa komissiýasynyň alyp barýan wezipeleri, daşky gurşawy goramak barada özleriniň tejribelik sapaklaryny geçdiler.
BMG-niň adam hukuklary boýunça komissarlygynyň ýokary müdirliginiň wekili jenap Igor Grişko howanyň üýtgemegi bilen bagly ylmy maglumatlar bilen çykyş etdi. Bu ugurdan talyplar öz aralarynda gyzykly sorag-jogaplary alyşdylar. Latwiýa döwletiniň adam hukuklary boýunça Ýewropa kazyýetiniň kazysy Martin Mits kazyýet işi bilen bagly öz tejribesini talyplar bilen paýlaşdy. Sapagyň dowamynda talyplar kazyýetde çykyş etmek ukybyny ösdürmek bilen bagly berlen ýumuşlary hem ýerine ýetirdiler.
Gazagystan Respublikasynyň Almata şäherine guralan okuw sapary talyplaryň halkara hukugy ugrundan kämil hünärmenler bolup kemala gelmeginde uly tejribe mekdebi bolup durýar. Okuw sapagynyň soňky gününde oňa gatnaşyjylara degişli şahadatnamalar dabaraly ýagdaýda gowşuryldy. Türkmenistandan gatnaşan talyp ýaşlar özleriniň saýlap alan hünärlerini kämilleşdirmekleri üçin giň mümkinçilikleri döredýän türkmen halkynyň Milli Lideri Gahryman arkadagymyza, Arkadagly Gahryman Serdarymyza tüýs ýürekden hoşallyklaryny bildirýärler.
Umyt ANNAGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň IV ýyl talyby.
Bu barada şu ýerde hem okap bilersiňiz: