Täsirli geçen okuw sapagy
2022-nji ýylyň 26-njy dekabrynda Türkmenistanyň Daşary işler ministrliginiň Halkara gatnaşyklary institutynda Birleşen Arap Emirlikleriniň Türkmenistandaky Adatdan daşary we Doly ygtyýarly Ilçisi Ahmed Al Haý Al Hameliniň gatnaşmagynda okuw sapagy gurnaldy. Bu okuw sapagyna institutyň talyplary gatnaşdylar.
Okuw sapagynyň dowamynda hormatly Ilçi Türkmenistan bilen BAE-niň arasyndaky gatnaşyklaryň täze derejä çykýandygyny nygtap, geljegi uly ugurlar hökmünde ýangyç energetikany, gaz-himiýa senagatyny, gaýtadan dikeldilýän energiýany, ulag infrastrukturasyny belledi. Şeýle hem hormatly Ilçi öz çykyşynda diplomatik gatnaşyklaryň ýola goýulmagynyň 27 ýylynyň içinde gazanylan tejribe dogrusynda belläp, Türkmenistanyň we Birleşen Arap Emirlikleriniň arasynda ýaşlaryň hukuklaryny we mümkinçiliklerini giňeltmek ugrunda hyzmatdaşlyk barada giňişleýin gürrüň berdi.
Okuw sapagynyň barşynda talyplar tejribeli Ilçä özlerini gyzyklandyrýan sowallary berdiler. Hormatly Ilçi özüne berlen sowallara maslahata ýugrulan jogaplary berdi.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň mugallymy.