TÄSIRLI GEÇEN OKUW SAPAGY
2026-njy ýylyň 11-nji maýynda Türkmenistanyň Daşary işler ministrliginiň Halkara gatnaşyklary institutynyň okuw otagynda Täjik Milli uniwersitetiniň wekiliniň gatnaşmagynda okuw sapagy geçirildi. Türkmen-täjik ylym-bilim hyzmatdaşlygynyň çäklerinde guralan bu çärä institutymyzyň professor-mugallymlary we talyp ýaşlary uly gyzyklanma bilen gatnaşdylar.
Okuw sapagyny dünýä ykdysadyýeti kafedrasynyň dosenti Mahadmumin Tagoýew alyp bardy. Myhman häzirki döwürde dünýä ykdysadyýetiniň ösüş meýilleri, döwrebap ykdysady nusgalar we halkara söwda gatnaşyklarynyň aýratynlyklary barada çykyş edip, talyp ýaşlara gymmatly maglumatlary berdi. Esasan hem, häzirki zaman dünýä hojalygynyň ösüş ugrunyň binýatlyk esaslary we maliýe-ykdysady ulgamlaryň özara täsiri baradaky meselelere aýratyn üns çekildi.
Mundan başga-da, okuw sapagynyň dowamynda dosent Mahadmumin Tagoýew ykdysadyýet hünärinde bilim alýan talyplara degişli maslahatlaryny berdi. Ol özüniň baý tejribesine salgylanyp, ýerli, sebit we dünýä ykdysadyýetine degişli maglumatlary dogry seljermek, seljeriş ukyplaryny kämilleşdirmek hem-de halkara ykdysady görkezijileri özleşdirmegiň usullary barada giňişleýin durup geçdi.
Gyzykly geçen okuw sapagy talyp ýaşlarda uly täsirleri galdyrdy. Sapagyň dowamynda talyplar özlerini gyzyklandyrýan sowallara jikme-jik jogap aldylar. Şeýle okuw sapaklary talyplaryň hünär tejribesini artdyrmak bilen birlikde, ylym-bilim hyzmatdaşlygynyň hem barha ilerledilmegini şertlendirýär.
Döwran ÝOWBAGŞYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby.