Täsirli geçen duşuşyk
2023-nji ýylyň 13-nji ýanwarynda Türkmenistanyň Daşary işler ministrliginiň Halkara gatnaşyklary institutynda milli diplomatiýanyň bu ýokary okuw mekdebiniň halypa mugallymlary bilen talyplaryň arasynda duşuşyk geçirildi. Oňa Halkara žurnalistikasy fakultetiniň Syýasy kommunikasiýa we internet žurnalistikasy hünäriniň I–II ýyl talyplary gatnaşdylar.
Duşuşykda Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew, Strategiki barlaglar boýunça ylmy merkeziň işgärleri, Žurnalistikanyň nazaryýeti we amalyýeti kafedrasynyň mugallymlary çykyş edip, žurnalistikanyň esaslary, onuň aýratynlyklary we inçe syrlary barada gyzykly gürrüňleri berdiler.
Çärede şeýle hem institutyň çäginde hereket edýän okuw studiýasynda yzygiderli ýazgy edilýän “Möhüm habarlar” hepdelik media habaryna giňişleýin seljerme berlip, degerli bellikler aýdyldy, maglumatlary toplamagyň we ýaýratmagyň usullarynyň üstünde durlup geçildi.
Duşuşygyň ahyrynda gyzyklandyrýan meseleler boýunça sorag-jogaplar alyşyldy.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
Syýasy kommunikasiýa we internet
žurnalistikasy
hünäriniň I ýyl talyby.