Taryhymyza gaýybana syýahat
2022-nji ýylyň 9-njy martynda Türkmenistanyň Daşary işler ministrliginiň Halkara gatnaşyklary institutynyň guramagynda «Parahatçylygyň ýaş çaparlary» atly akyl-paýhas bäsleşiginiň I saýlama tapgyrynyň 5-nji oýnuna gatnaşýan mekdep okuwçylary üçin Türkmenistanyň Ylymlar akademiýasynyň Taryh we arheologiýa institutyna gezelenç guraldy. Ýaş çaparlar institutyň muzeýinde dürli taryhy çeşmeler, taryhy ýadygärlikler bilen tanyş boldular. Institutyň alymlary okuwçylara Horezmşalar döwletiniň taryhy, içeri we daşary syýasaty, diplomatiýasy, şeýle-de medeniýeti barada gyzykly gürrüňleri berdiler. Horezmşalar döwletiniň binagärlik sungaty baradaky edilen gürrüňler okuwçylarda uly täsir galdyrdy. Gadymy Gürgençde ýerleşen Tekeşiň, Il-Arslanyň, Törebeg hanymyň, Gutlug Timuryň minaralary özüniň gözelligi, nagyşlarynyň nepisligi, berkligi bilen köpleri haýrana goýýar. Häzirki wagtda bu taryhy ýadygärlikleri öwrenmeklige ýurdumyzda uly üns berlip, olara täzeçil çemeleşilýär. Bu guralan gezelenç bäsleşikden öň ýaş çaparlar üçin örän ýerlikli gollanma boldy.
Şeýle bäsleşikleriň üsti bilen biz — okuwçylara zehinimizi, ukyp-başarnygymyzy açyp görkezmek üçin giň mümkinçilikler döredip berýän Gahryman Arkadagymyza köp sagbolsun aýdýarys. Goý, milli Liderimiziň jany sag, ömri uzak bolsun, tutýan tutumly işleri hemişe rowaçlyklara beslensin!
Akhumaý ÇARYÝEWA,
Aşgabat şäherindäki Saparmyrat Türkmenbaşy
adyndaky
ýöriteleşdirilen umumybilim berýän
mekdep-internatynyň XI synp okuwçysy.