Talyplarymyzyň döredijilik üstünlikleri
Golaýda (2021-nji ýylyň 4-nji sentýabrynda)Türkmenbaşynyň erkin döredijilik mekanynyň maslahatlar zalynda Türkmenistanyň Medeniýet ministrliginiň, Türkmenistanyň Kärdeşler arkalaşyklarynyň Milli merkeziniň hem-de «Edebiýat we sungat» gazetiniň bilelikde guramagynda «Garaşsyzlyk – buýsanjymyz, bagtymyz» atly döredijilik bäsleşiginiň ýeňijilerini sylaglamak dabarasy geçirildi. Şanly Garaşsyzlygymyzyň 30 ýyllygy mynasybetli döredijilik bilen meşgullanýan zehinlileriň eserlerini halk köpçüligine ýetirmekmaksady bilen geçirilen bu bäsleşige ýurdumyzyň halypa ýazyjy-şahyrlary, žurnalistleri we dörediji ýaşlar gatnaşdylar. Bäsleşigiň netijeleri boýunça ýeňiji bolanlara guramaçylar tarapyndan gymmat bahaly sowgatlar we Hormat hatlary gowşuryldy.
Ýokary derejede geçirilen döredijilik bäsleşigine institutymyzyň zehinli talyp ýaşlaryndan hem birnäçesi gatnaşdy. Olardan Halkara žurnalistikasy fakultetiniň III ýyl talyby Tawus Akjaýewa we şol fakultetiň II ýyl talyby Aýlar Atajykowa özleriniň döreden ajaýyp şygyrlary bilen üstünlikli çykyş edip, ýeňiji bolmagy başardylar. Sylaglandyryş dabarasynyň ahyrynda talyplarymyzyň mukaddes Garaşsyzlygymyza we eziz Watanymyzyň ösüşlerine, Gahryman Arkadagymyzyň ýaşlar üçin döredýän uly mümkinçiliklerine bolan ýürek buýsançlary «Aşgabat» teleýaýlymy arkaly ýaýlyma berildi. Şeýle bäsleşikleriň yzygiderli geçirilmegi döredijilik bilen meşgullanýan ýaşlary belent üstünliklere ruhlandyrýar.
Gülnar Akyllyýewa,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby.