TALYPLARYMYZ TASLAMA IŞLERIŇ SERGI BÄSLEŞIGINE GATNAŞDY
2026-njy ýylyň 15-nji aprelinde Seýitnazar Seýdi adyndaky Türkmen döwlet mugallymçylyk institutynda «Ösüş üçin innowasiýa – 2026» atly taslama işleriň Sergi bäsleşiginiň II tapgyry geçirildi. Ylmy-döredijilik bäsleşige ýurdumyzyň orta hem-de ýokary okuw mekdeplerinden ylma we hünär döredijiligine höwesli ýaşlar ylmy-taslama işleri bilen oflaýn hem-de onlaýn tertipde gatnaşdylar.
Bäsleşik ýurdumyzyň Lebap welaýatynyň Türkmenabat şäherinde Seýitnazar Seýdi adyndaky Türkmen döwlet mugallymçylyk institutynda geçirilen jemleýji tapgyryna Türkmenistanyň Daşary işler ministrliginiň Halkara gatnaşyklary institutynyň talyplaryndan ybarat bolan iki topar gatnaşdy. Sergi bäsleşiginiň «Tebigy we takyk ugurly amaly çözgütler» atly ugruna «Beýi ýapragynyň we onuň demlemesiniň melhemlik häsiýetleri» ady bilen Halkara gatnaşyklary fakultetiniň III ýyl talyplary Sahydöwlet Hümmetjumaýew, Şyhdurdy Şyhyýew, Taňryguly Geldimämmedow, «Güberçeklik düşünjesiniň amalyýetde ulanylyşy» ady bilen Halkara ykdysady gatnaşyklary fakultetiniň talyplary Döwlet Kerimow, Begli Sultanow, Atajan Ataýew dagylar gatnaşdylar. Talyplaryň ylmy işlerine Halkara ykdysady gatnaşyklary fakultetiniň mugallymy Sülgün Nepesowa ýolbaşçylyk etdi.
Sergi bäsleşiginiň esasy maksady ýaşlaryň ylmy-döredijilik mümkinçiliklerini ýüze çykarmak, ylmy-tehniki we innowasion ugurlardaky taslamalaryny goldamak hem-de höweslendirmekden ybarat boldy.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
ykdysady gatnaşyklary kafedrasynyň mugallymy.