Talyplar iňlis we rus dillerinden barlag testlerini tabşyrdylar
2022-nji ýylyň 3-nji sentýabrynda Türkmenistanyň Daşary işler ministrliginiň Halkara gatnaşyklary institutynyň kiçi mejlisler zalynda institutyň 1-nji ýyl talyplary iňlis we rus dillerinden barlag testlerini tabşyrdylar.
Institutyň halypa mugallymlarynyň, şeýle-de ýurdumyzda daşary ýurt dillerini öwrenmäge höwesli ýaşlaryň ençemesini özünde jemleýän “Gujurly nesil” okuw merkeziniň wekilleriniň gatnaşmagynda guralan test barlaglary ýokary guramaçylykly geçirildi. Ýeri gelende bellesek, bu abraýly dil merkezi indi birnäçe ýyldan bäri institut bilen köptaraplaýyn hyzmatdaşlyk saklaýar.
50 soragdan ybarat bolan her dil üçin 50 minut wagt berildi. Geçirilen testleriň netijesi kompýuter tehnologiýasynyň üsti bilen anyklanylar. Talyp ýaşlar berlen wagtdan netijeli peýdalanyp, testleriň jogaplaryny örän gysga wagtyň içinde mugallymlara gowşurdylar. Munuň özi instituta täze gadam basan ýaşlaryň dil bilimleriniň ýokarydygyny subut edýär. Bu ajaýyp görkeziji bolsa ata Watanymyzda Arkadagly Serdarymyzyň parasatly ýolbaşçylygynda ylym-bilime, hünäriňi kämilleşdirmäge, daşary ýurt dillerini has-da çuňlaşdyryp öwrenmäge giň mümkinçilikleriň döredilýändiginiň nobatdaky beýanydyr.
Aýnabat NAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň öwreniji-mugallymy.
Şeýle hem bu barada şu ýerden okap bilersiňiz!